Այսօր արտակարգ իրավիճակների նախարար Մհեր Շահգելդյանը Կառավարության նիստի ժամանակ ներկայացրեց «Աղետների բժշկության տարածաշրջանային կենտրոն» պետական ոչ առևտրային կազմակերպություն ստեղծելու ծրագիր: «Արտակարգ իրավիճակների եւ պատերազմի հետեւանքներից բնակչության պաշտպանության կարեւորագույն խնդիրներից մեկը աղետների բժշկության համակարգն է. Սպիտակի երկրաշարժի ուսումնասիրությունը ցույց է տալիս, որ այս համակարգի ձեւավորված չլինելը մեծաքանակ զոհերի պատճառ է դառնում»,- ծրագիրn այսպես հիմնավորեց նախարարը: Կենտրոնի գործառույթներն են լինելու վերապատրաստման, տեղեկատվայնացման, կանխարգելման գործառույթների իրականացումը. «Մենք գտնում ենք, որ կարող է ունենալ տարածաշրջանային նշանակություն, քանի որ տարածաշրջանի այլ երկրներում նման կենտրոն գոյություն չունի»: Ծրագրին կաջակցեն Շվեյցարիայի զարգացման գործակալությունը, սփյուռքահայ կազմակերպությունները: Վարչապետը հետաքրքրվեց, թե ինչ ֆինանսական պարտավորություններ է առաջացնում ծրագիրը: « Մենք կփորձենք մեր ներքին ռեսուրսները օգտագործելով իրականացնել ծրագիրը»,- պատասխանեց նախարարը: Ծրագիրը հաստատվեց: