Տեսանյութեր
Լուսանկարներ
10 աշխատանքային խումբ` ստորգետնյա ջրային ռեսուրսներն ուսումնասիրելու համար
Օգոստոսի 17-ին, ՀՀ բնապահպանության նախարար Արամ Հարությունյանն աշխատանքային այցով մեկնել է Արմավիրի մարզ` անցկացնելու խորհրդակցություն` նվիրված մարզում առկա բնապահպանական խնդիրներին, այդ թվում` ստորգետնյա ջրային ռեսուրսների օգտագործմանն ու պահպանմանը:
Նախարար Արամ Հարությունյանը նշեց, որ այս խնդիրները ունեն շատ երկար տարիների վաղեմություն և միայն համատեղ ու օպերատիվ աշխատանքի շնորհիվ հնարավոր կլինի լուծել դրանք: Խնդիրների լուծման գործում նախարարն ակնկալում է մարզպետարանի, համայնքների ղեկավարների աջակցությունը:
Նախարարը նշեց, նաև որ ստորգետնյա ջրային ռեսուրսների օգտագործման խնդիրները իր ուշադրության կենտրոնում են, դրանց արդյունավետ կառավարման և փաստացի իրավիճակը արձանագրելու նպատակով ստեղծվել է 10 աշխատանքային խումբ, որոնք մարզպետարանի համապատասխան վարչությունների և տեղական ինքնակառավարման մարմինների աշխատակիցների հետ համատեղ կիրականացնեն ուսումնասիրություններ` ըստ հաստատված ժամանակացույցի և հարցաշարի:
Արամ Հարությունյանը տեղեկացրեց, որ այդ աշխատանքները ավարտվելու են երկու շաբաթից. իրական պատկերն ունենալուց հետո կիրականացվեն օրենսդրությամբ սահմանված համապատասխան գործողություններ կարգազանցների նկատմամբ:
Արամավիրի մարզպետ Ա. Ղահրամանյանը իր երախտիքի խոսքն հայտնեց նախարարին մարզում բնապահպանական խնդիրները կարևորելու, ինչպես նաև մարզին խիստ անհրաժեշտ և կարևորագուն խնդիրը` խմելու ջրի հարցը, քննարկելու և դրական լուծում տալու համար: Նա նշեց նաև, որ մարզում խորքային ջրերի անխնա օգտագործման հետևանքով, դրանց սպառման խնդիր է առաջացել, ու կարևորելով խնդիրը պատրաստակամություն հայտնեց համագործակցելու նախարարության հետ` տալով համապատասխան հանձնարարականեր մարզպետարանի վարչության պետերին և համայնքների ղեկավարներին:
Համայնքների ղեկավարները ևս բարձրացրեցին ջրաչափեր ձեռք բերելու, ինչպես նաև համայնքներին տրամադրվող սուբվենցիաների հարցերը:
Նախարարը պատասխանեց, որ յուրաքանչյուր տնտեսվարող ինքը պետք է ձեռք բերի ջրաչափը, իսկ եթե կան խնդիրներ, ապա նախարարությունը պատրաստ է աջակցելու այդ հարցում, սուբվենցիաների հետ կապված` նախարարը խոստացավ առաջիկայում քննարկել բարձրացված հարցը:
Արամ Հարությունյանը, կարևորելով Արմավիրի մարզում առկա բնապահպանական խնդիրները, հավաստիացրեց, որ դրանք լինելու են իր մշտական և անմիջական հսկողության տակ` ակնկալելով նաև մարզպետարանի, համայնքների ղեկավարների աջակցությունը խնդիրներին վերջնական լուծում տալու գործում:
Այս մասին տեղեկացնում է ՀՀ բնապահպանության նախարարության մամուլի ծառայությունը:
Մեկնաբանել