Ս. Դեմիրճյան. «Հետեւողականորեն զբաղվելու ենք քաղաքում կուտակված խնդիրների լուծմամբ»
«Կար որոշակի պահանջ, որ ես գլխավորեի ցուցակը թե ՀԱԿ-ի շրջանակներում, թե ՀԱԿ-ից դուրս, սակայն ես ի սկզբանե այն տեսակետին էի, որ դա է ճիշտ տարբերակը, այդպես էլ եղավ»,- այսօր, անդրադառնալով ՀԱԿ-ի ցուցակին, Հայելի ակումբում ասաց Ստեփան Դեմիրճյանը: Նա նաեւ նշեց, որ որեւէ պայմանավորվածություն չկա ՀԱԿ-ի հաղթանակի դեպքում ցուցակը իր կողմից գլխավորելու առումով:
Ստեփան Դեմիրճյանը կրկնեց ՀԱԿ-ի հայտարարությունը, թե այս ընտրությունները եւս մեկ փուլ են երկրում սահմանադրական կարգը հաստատելու. «Սակայն սա չի նշանակում, որ եթե ընդդիմությունը հաղթի, անտեսելու է քաղաքի խնդիրները: Մենք հետեւողականորեն զբաղվելու ենք քաղաքում կուտակված տարաբնույթ խնդիրների լուծմամբ, խնդիրները շատ են` ապօրինի շինարարություն, կանաչ տարածքների ոչնչացում, բարվոք վիճակում չէ բնակարանային ֆոնդը»:
Ըստ Ստեփան Դեմիրճյանի` Հայաստանում ճգնաժամ է, բայց ոչ միայն ֆինանսատնտեսական. «Մենք չենք թերագնահատում տնտեսական ճգնաժամի բացասական ազդեցությունը, բայց չի կարելի ամեն ինչ արդարացնել այդ ազդեցությամբ: Խոսելով դրա մասին` չմոռանանք այն բացասական ազդեցությունները, որ թողնում են երկրում գործող կրիմինալ-օլիգարխիկ համակարգը. տնտեսությունը շարունակում է գտնվել մի խումբ մարդկանց ձեռքում»: Նա շեշտեց, որ իշխանությունը ստեղծված իրավիճակից դուրս գալու համար ռեալ քայլեր չի ձեռնարկում:
«Իշխանությունը ներկայացնում է քայլեր` Հանրային խորհուրդ եւ այլն, եւ այլն: Բայց դրա փոխարեն, եթե մի բարձրաստիճան պաշտոնյայի պատասխանատվության ենթարկեին, դա շատ ավելի դրական ազդեցություն կունենար, կամ ազատ արձակեին քաղբանտարկյալներին: Մարդիկ վրդովված են ամենաթողության պատճառով: Մարդիկ կարող են օրը ցերեկով մարդ սպանել: Կոնկրետ այս ուղղությամբ է պետք քայլեր անել»,- խորհուրդ տվեց բանախոսը:
Ստեփան Դեմիրճյանը նշեց, որ նաեւ ընտրությունների տոկոսներն են միշտ նկարվել. «Եթե ընտրությունները լինեն արդար, ես համոզված եմ, որ ընդդիմությունը շանսեր ունի հաղթելու: Ի՞նչ է նշանակում հաղթանակ: Հաղթանակ` դա ստանալ 40 տոկոս»: Ստեփան Դեմիրճյանը ընդգծեց, որ այսօր արդեն կարելի է արձանագրել, որ «ընտրությունները հազիվ թե արդար լինեն, քանի որ հիմքեր չկան պնդելու հակառակը»:
Լրագրողները խնդրեցին ներկայացնել այն մեխանիզմները, որոնց օգտագործմամբ ՀԱԿ-ը քաղաքապետի ընտրություններում հաղթելու դեպքում կանցկացնի արտահերթ ընտրություններ. «Մենք նպատակահարմար ենք գտնում արտահերթ ընտրությունները: Ընտրությունների պատճառով առաջացած ճգնաժամը, ի վերջո, պետք է հաղթահարվի: Իշխանությունները պետք է հաշվի առնի հասարակական պահանջը»:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել