Երևանից մեկնելով Բաքու և կրկին վերադառնալով Երևան` այսօր ԵԱՀԿ Մինսկի խմբի համանախագահները հայ լրագրողների հետ հանդիպման ժամանակ Ստեփանակերտ չայցելելը պատճառաբանեցին եղանակային ոչ բարենպաստ պայմաններով: ԵԱՀԿ Մինսկի խմբի ֆրանսիացի համանախագահ Բեռնար Ֆասիեն տեղեկացրեց, որ իրենց հանդիպումները շատ հագեցած են եղել և երկար աշխատանք տանելուց հետո Ադրբեջանի և Հայաստանի նախագահներ Իլհամ Ալիևը և Սերժ Սարգսյանը հաստատել են իրենց համաձայնությունը հանդիպելու Պրահայում մայիսի 7-ին: «Ընդհանուր համատեքստում, հաշվի առնելով երկու կողմերի հայտարությունները, կան առաջընթացի ողջամիտ հույսեր, և այդ հույսերը հուշում են, որ պրահյան հանդիպումը ծայրաստիճան կառուցողական է լինելու»,- ասաց ֆրանսիացի համանախագահը: Նա հավելեց, որ չնայած իրենք դեռ չեն ստացել համաձայնության հաստատում, բայց հունիսի սկզբին հնարավոր է երկու նախագահների հանդիպում Սանկտ-Պետերբուրգում: Ըստ Ֆասիեի` միջնորդ երեք երկրների կողմից առաջ քաշված Մադրիդյան սկզբունքները մնում են բանակցային սեղանին, եւ նախագահները դրանք կքննարկեն նաև Պրահայում: Ռուսաստանցի համանախագահ Յուրի Մերզլյակովը կարծիք հայտնեց, թե առաջընթացի ինչ-որ նոր նախադրյալներ չեն ծագել, բայց «բոլոր պայմանները կան` գործընթացն առաջ տանելու և արագացնելու»,- ասաց նա` որպես փաստ նշելով Ի. Ալիևի և Սերժ Սարգսյանի իրար հաջորդող այցերը Ռուսաստան: Ամերիկացի համանախագահ Մեթյու Բրայզան էլ հայտարարեց, թե կոնֆլիկտի լուծումը մոտակա մի քանի ամիսների ընթացքում հնարավոր է, բայց կոնկրետ ժամկետների մասին նախընտրեց չխոսել: Լրագրողներից մեկի այն հարցին, թե եթե նման առաջընթաց է նկատվում, հնարավոր է, որ շուտով Լեռնային Ղարաբաղի հակամարտության լուծման շուրջ էլ ճանապարհային քարտեզ սահմանվի, Յուրի Մերզլյակովը պատասխանեց. «Դա կախված է նրանից, թե ինչ կոնկրետ որոշումներ կընդունեն կողմերը այն հարցի շուրջ, թե ինչ կերպ կմշակվի համապատասխան խաղաղության համաձայնագիրը կարգավորման հիմնարար սկզբունքները հաստատելուց հետո»: Ֆրանսիացի համանախագահն էլ այս համատեքստում նկատեց, որ երկու երկրների նախագահները միտված են իրենց երկրների հասարակություններին պատրաստելու բարիդրացիական