Ա.Ռուստամյանը հուսով է, որ իշխանությունը չի ճնշի Դաշնակցությանը
«Դաշնակցությունն ունի մեծ բիզնեսով զբաղվող պատգամավորներ, նախարարներ, մտավախություն չունեք, որ իշխանությունները փորձեն հարկային տեռոր իրականացնել Ձեր համակիրների նկատմամբ, որպեսզի լիարժեք ընդդիմություն չդառնաք»,-լրագրողի հարցը ուղղեց ՀՅԴ Հայաստանի Գերագույն մարմնի ներկայացուցիչ Արմեն Ռուստամյանին այսօր տեղի ունեցած լրագրողների հետ հանդիպման ժամանակ:
«Մենք արդեն ընդդիմություն ենք, իսկ հալածանքներ կամ հետապնդումներ կարող են լինել, բայց հուսով եմ, որ այդ ճանապարհով պիտի չգնան իշխանությունները` ինչ-որ կադրային ջարդեր եւ այլն, դա երկրի համար լավ չի: Եթե փորձեն նորից տեսնել` ինչքան ենք դրան դիմանում, լավ, թող մի հատ էլ փորձեն, բայց դա լավ չի, լավ չի որեւէ քաղաքական ուժի նկատմամբ նման միջոցներ կիրառելը»,-պատասխանեց Ռուստամյանը:
Լրագրողները հետաքրքրվեցին, թե հնարավոր է, որ «Կուռ ենք, կուռ ենք» երգի բովանդակությունը փոխվի, այսինքն կուսակցականները լքեն ՀՅԴ-ն. «Ինչ վերաբերում են երգերին, մեր երգերը ի տարբերություն այլ երգերի, գրվում են կայացած փաստերից հետո, երբ պատմականորեն այդ փաստերը իրականացվում են»:
Լրագրողները նկատեցին. «Բա Ստամբուլը արյան ծով դարձնելը»:
Արմեն Ռուստամյանը ընդգծեց, որ երգերը համապատասխանում են իրենց ցանկություններին եւ իրավիճակին: «Ես վստահ եմ, որ մեր շարքերը իսկապես կուռ են եւ լինելու են, այս որոշումը միանշանակ ընկալման արդյունք է, որեւէ հարց չի կարող առաջանալ»,-ասաց Ա.Ռուստամյանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել