Գաղտնազերծելով Հայաստանի եւ Թուրքիայի միջեւ համաձայնեցված «ճանապարհային քարտեզի» մանրամասները` թուրքական լրատվամիջոցները գրեցին, որ դրանով Հայաստանը ճանաչելու է նաեւ Կարսի պայմանագիրը: Շաբաթ օրն անվտանգության խորհրդի նիստում նախագահ Սերժ Սարգսյանն անդրադարձավ հանրության շրջանում «ճանապարհային քարտեզի» մանրամասնությունների կապակցությամբ առաջացած մտահոգություններին, սակայն Կարսի պայմանագրի մասին որեւէ բառ չասաց: Այդ մասին որեւէ հիշատակում չկա նաեւ արտգործնախարար Էդվարդ Նալբանդյանի ծավալուն հարցազրույցում: «Հետքը» ԱԳՆ մամուլի քարտուղար Տիգրան Բալայանից փորձեց ճշտել` արդյոք Կարսի պայմանագրի վավերացումը տեղ գտե՞լ է «Ճանապարհային քարտեզ» կոչվածում: «Կարծում եմ` նախարարի պատասխանները սպառիչ էին»,- ասաց Տ. Բալայանը: Իսկ երբ շեշտեցինք, որ Էդվարդ Նալբանդյանը պայմանագրի մասին առհասարակ չի խոսել, մամլո քարտուղարը հավելեց. «Ես ոչինչ չեմ կարող ավելացնել»: