«Փոխոստիկանապետ Գևորգ Մհերյանի սպանության բացահայտմանն ուղղված աշխատանքների հետ կապված, ցավոք, այս պահին որևիցե դրական արդյունք չկա»: Այսօր կայացած մամուլի ասուլիսում այս մասին հայտարարեց ՀՀ  ոստիկանապետ Ալիկ Սարգսյանը:

«Չորս վարկածների ուղղությամբ, որոնք ես արդեն նշել էի, աշխատանքներ կատարվում են, հինգերորդ վարկած չկա այս պահին: Կարծում եմ` ընտրված են այնպիսի վարկածներ, որոնցում ներառվում են սպանության այն բոլոր պատճառները, որոնց ուղղությամբ պետք է աշխատել: Աշխատանքում դանդաղկոտություն, հապաղում չեմ տեսնում, քանի որ դա մեզ համար արժանապատվության խնդիր է: Քանի դեռ չի բացահայտվել Գևորգ Մհերյանի սպանության գործը, որևիցե ոստիկան, մեղմ ասած, իրեն լավ զգալ չի կարող: Մենք բացահայտելու ենք այդ գործը, չկասկածեք դրանում»,- հավաստիացրեց ոստիկանապետը: Ա. Սարգսյանը հաստատեց, որ գեներալ Մանվել Գրիգորյանի թիկնապահներից երկուսն այսօր ձերբակալվել են: «Դեպքը երեկ է արձանագրվել: Համաձայն տուժողի հայտարարության` գեներալ Մանվել Գրիգորյանի թիկնապահներից երկուսը իրեն մարմնական վնասվածք են պատճառել: Գործին ընթացք է տրվել, այս պահին նյութեր են ստեղծվել, ընդամենը մեկ ժամ առաջ էլ թիկնապահները բերման են ենթարկվել ոստիկանության բաժին: Այս պահին աշխատում ենք, տուժողը կգա, կճանաչի, գործը կստանա հավուր պատշաճի ընթացք»,- ասաց նա: Ոստիկանապետն անդրադարձավ նաև լրագրող, «Հետաքննող լրագրողներ» հ/կ-ի նախագահ Էդիկ Բաղդասարյանի գործին` նշելով, որ դատահոգեբուժական փորձաքննություն է նշանակվել հանցագործի նկատմամբ, փորձաքննությունը մի քանի օր առաջ ավարտվել է, և գործն այս պահին նախապատրաստվում է, քննչական գլխավոր վարչության վարույթում է և մինչև մայիսի 3-4-ը կլինի դատարանում: Հնարավո՞ր է, որ կոալիցիայից Դաշնակցության դուրս գալու հետևանքով ոստիկանությունը վեր հանի դաշնակցականների դեմ եղած որևէ դոսյե: Լրագրողներից մեկի այս հարցին ի պատասխան` ոստիկանապետը նշեց, որ ոստիկանությունը չի պատրաստվում որևէ դոսյե կիրառել կամ ձերբակալել որևէ դաշնակցականի: Ա. Սարգսյանը նշեց, որ իրենք Դաշնակցության հետ երբեք էլ խնդիրներ չեն ունեցել: «Իսկ հին դոսյեներ հանելը մեր խնդիրը չէ, դաշնակցականները մեր ընկերներն են ու համոզված եմ, որ ցանկացած դիրքում, թեկուզ իբրև ընդդիմություն, նրանք աջակցելու են պետությանը, իրենց փորձն են փոխանցելու: Նրանք Հայաստանի շահերի համար մտահոգվող, ցավող ժողովուրդ են»,- ասաց ՀՀ ոստիկանապետը: Նատաշա Հարությունյան