«Սա աղմկահարույց գործ էր, քանի որ Արտաշատի հետ էր կապված, և բոլորը փորձում էին շահարկել ԱԺ նախագահ Հովիկ Աբրահամյանի անունը: Ասեմ, որ նրա տղան ընդհանրապես առնչություն չունի այդ գործի հետ»,- այսօր կայացած մամուլի ասուլիսի ժամանակ, անդրադառնալով Արտաշատում տեղի ունեցած դեպքերին, ասաց ՀՀ ոստիկանապետ Ալիկ Սարգսյանը: «Կրակել են Հովիկ Աբրահամյանի եղբոր տղայի մեքենայի վրա: Հանցագործությունը շարունակություն է ունեցել` հետո էլ կրակել են այդ կրակողների տան վրա` Մրգավան գյուղում: Այս ընթացքում երկու տաքսի է այրվել, որոնք պատկանել են Հ. Աբրահամյանի եղբորորդու մեքենայի վրա կրակողներին: Բոլոր գործերով ոստիկանությունը ձեռնարկել է բոլոր անհրաժեշտ միջոցառումները: Կրակող անձը գտնվում է հետախուզման մեջ, շուտով կհայտնաբերվի, կկանգնի օրենքի առջև»,- հավաստիացրեց ոստիկանապետը: Իրականությանը համապատասխանո՞ւմ է, արդյոք, այն տեղեկատվությունը., որ ԱԺ պատգամավոր Աշոտ Աղաբաբյանի թիկնազորի թույլ տված ճանապարհա-տրանսպորտային խախտումների արդյունքում, որին ականատես էր եղել նաև Ա. Սարգսյանը, նույն օրը «Ծղոտներ» համալիրից ոստիկանություն են բերման ենթարկվել նաև ԱԺ պատգամավորներ Լևոն Սարգսյանը և Աշոտ Աղաբաբյանը: Ոստիկանապետը հերքեց այս տեղեկատվությունը` նշելով, որ Լևոն Սարգսյանը ընդհանրապես այս գործի հետ առնչություն չի ունեցել, իսկ Աշոտ Աղաբաբյանը խախտման ժամանակ մեքենաներից որևէ մեկում չի եղել: «Խախտում կատարած անձինք հայտնաբերվեցին «Ծղոտներ» համալիրում, սակայն որևէ պատգամավորի բերման չենք ենթարկել, բերել ենք նրանց թիկնազորը, անհրաժեշտ ստուգման ենք ենթարկել: Բերել ենք մեքենաներն ու այն մարդկանց, որոնք այդ պահին եղել են մեքենաների մեջ»,- հավաստիացրեց Ա. Սարգսյանը` ընդգծելով, որ այսուհետև էլ եթե ԱԺ պատգամավորների մեքենաներ կրկին փորձեն քաղաքում նման իրավիճակ ստեղծել, պատժից չեն խուսափի: «Չեմ հետաքրքրվելու, թե ում մեքենաներն են, բերելու ենք, պատժելու: Հետո թող տերերը հայտնվեն, ինչպես հիմա հայտնվեցին: Հաջորդ անգամ, համոզված եմ, Աշոտ Աղաբաբյանը չի տա իր մեքենան ամեն պատահած մարդկանց ու ասի` քշեք Երևանում ոնց կուզեք, որովհետև Երևանում մեր դեմ խաղ չկա: Երևանում բոլորի դեմ խաղ կա: Մեզ հետ չեն կարողանալու խաղալ: Խայտառակելու եմ բոլորին, ով խախտում կատարի: Ոչ մեկի անունը չեմ թաքցնելու»,-ասաց նա: Անդրադառնալով շրջանառվող լուրերին, որ օրերս ՀՀ գլխավոր դատախազ Աղվան Հովսեփյանի եղբորորդին ծեծի է ենթարկել մի քանի ոստիկանների, ինչի արդյունքում նրանց տարել են բաժին, սակայն Աղվան Հովսեփյանի միջամտությունից հետո բաց են թողել, ոստիկանապետը նշեց, որ որևէ ոստիկան ծեծի չի ենթարկվել: «Աղվան Հովսեփյանի եղբորորդին, իրոք, երթևեկության կանոնները խախտել է, ոստիկանները կանգնեցրել են, պահանջել են համապատասխան փաստաթղթեր, չի ունեցել, տարել են ոստիկանություն: Նա տուգանվել է, ապա ազատ է արձակվել, և այս ամենը տևել է 30 րոպե: Աղվան Հովսեփյանի եղբոր տղան ոչ մի ոստիկանի չի ծեծել: Նման բան ընդհանրապես չկա, դա ինչ-որ մեկի հորինածն է, խնդրում եմ, հավատացեք ինձ: Այսօր ոչ ոք չի կարող ծեծել ոստիկաններին ու մնալ անպատիժ, այդպիսի բան հնարավոր չէ»,- հավաստիացրեց ոստիկանապետը: Նատաշա Հարությունյան