Ապրիլ ամսվա անբարենպաստ եղանակներից, ցրտից ու ձյունից վնասվել են ծաղկած ծառերը: Ըստ  Սյունիքի մարզպետարանի գյուղատնտեսության և բնապահպանության վարչության պետ Քաջիկ Խաչատրյանի եթե աշնանացան մշակաբույսերը հիմնականում չեն տուժել, ապա կորիզավոր պտուղների ծառերը (դեղձ, ծիրան, սալոր, կեռաս, բալ) 40-45 տոկոսով ցրտահարվել են: Որոշակի վնաս է հասցվել նոր ցանված կարտոֆիլին: Մեղրիի տարածաշրջանում տուժել են պտղատու ծառերը (արքայանարինջ, ծիրան, ընկույզ և այլն), խաղողի այգիները, ինչպես նաև բանջարաբոստանային մշակաբույսերը: Մեղրու քաղաքապետարանում ստեղծված հանձնաժողովն ուսումնասիրել է և ճշտել ցրտահարության պատճառած վնասները և կազմել համապատասխան ակտ: Մասնավորապես  ցրտահարվել են Մեղրիի համայնքի  պտղատու այգիների 30-35, խաղողի այգիների` 45-50, բանջարաբոստանային ցանքսերի` 50-60 տոկոսը:  Ցրտահարության պատճառած վնասների չափերը ճշտելու նպատակով համայնքներում ստեղծվել են հանձնաժողովներ, որոնք վնասների ակտերը պիտի ներկայացնեն Սյունիք մարզպետարան: Կապանի տարածաշրջանի Սյունիք գյուղական համայնքի ղեկավար Սամվել Սարգսյանի փաստմամբ էլ համայնքում 20 հա-ից ավելի տնամերձ այգիներ, հիմնականում մրգատու ծառեր ցրտահարվել են: «Այս տարի հավանաբար բերք չենք ունենա: Նախնական հաշվարկներով գյուղացիական տնտեսություններին մոտ 15 մլն դրամի վնաս է  հասցվել»,-ասում է գյուղապետը: Ո՞վ կամ ե՞րբ են  փոխհատուցելու վնասները պարզ չէ: Բնության անակնկալներից տուժած գյուղացիները հույս դրել են կառավարության վրա, չնայած ֆինանսկան միջազգային ճգնաժամի պայմաններում չեն կարծում, որ կստանան փոխհատուցում: