«Հայ եւ թուրք ժողովուրդների համատեղ պատմությունը պետք է գնահատվի օբյեկտիվ եւ գիտական մոտեցմամբ, որը կամրապնդվի անվիճելի ապացույցներով, փաստաթղթերով եւ ազատ կլինի կանխակալ բոլոր պատկերացումներից»,-այսօր ՀՅԴ-ական Արտյուշա Շահբազյանն ուղղակի մեջբերում կատարեց Թուրքիայի Ազգային անվտանգության խորհրդի նիստի ժամանակ ընդունված հայտարարության այն կետը, որը վերաբերում է Հայաստանին: Ըստ այդ կետի էլ` պատգամավորը հարց ուղղեց ԱԳՆ նախարար Էդվարդ Նալբանդյանին. «Արդյոք սա չի խոսում այն մասին, որ կան նախապայմաններ, եւ մասնավորապես հայ-թուրք հարաբերությունների նախապայմաններից մեկը պատմության ուսումնասիրության հանձնաժողովի ստեղծումն է»: Նախարարը նշեց. «Դուք կարծում եք, որ մեզ կարող էր գոհացնել ինչ-որ նախապայմաններ, երբ որ մենք բազմիցս հանրապետության նախագահի մակարդակով հայտարարել ենք, եւ արտգործնախարարի, ես ինքս եմ հայտարարել, որ որեւէ նախապայման չկա: Մենք բանակցությունները մեկնարկել ենք այդ ըմբռնումով, փոխադարձ ըմբռնումով, մենք վարել ենք այդ բանակցությունները փոխադարձ ըմբռնումով, որ չկան նախապայմաններ, եւ եկել ենք առաջընթացի նույն ըմբռնումով»: