Այսօր առավոտից երթուղի դուրս չեն եկել Էջմիածնից, Աշտարակից, Արագածոտնի մարզի Բյուրական եւ Ագարակ գյուղերից եւ այլ վայրերից մայրաքաղաք եկող տրանսպորտային միջոցները: էջմիածնեցի տարեց մի կին Հանրապետական հիվանդանոց էր շտապում` հիվանդ որդուն այցելության, սակայն մի քանի ժամ կանգառում սպասելուց հետո, ստիպված օգտվեց տաքսուց: Եթե սովորական օրերին Էջմիածնից Երեւան հասնելու համար քաղաքացիները ծախսում են 220-250 դրամ՝ կախված նրանից, օգտվում են երթուղային տաքսիներից, թե ավտոբուսներից, ապա այսօր նրանք մայրաքաղաք հասնելու համար պետք է վճարի 2000 դրամ: Պատճառն այն է, որ երթուղի դուրս չեն եկել 111 համարի ավտոբուսներն ու մոտ 20 միկրոավտոբուսներից եւ ոչ մեկը: Փոխարենը կանգառում իրար ետեւից շարված են տասի ավտոմեքենաները, որոնց վարորդները կարգախոսներով ուղեւորներ էին թռցնում իրարից: «Էսօր հազիվ գործներս կպել ա, լույսը նոր ա բացվել, բայց արդեն 3 անգամ Երեւան եմ գնացել»,-հպարտանում էր  «Քարավան» տաքսի ծառայության վարորդներից մեկը: Տեղեկացնենք, որ Էջմիածին-Երեւան երթուղին սպասարկում է «Էջմիածնի ԲՈՒԱՏ» ընկերությունը, որը պատկանում է ԱԺ պատգամավոր, հանրապետական խմբակցության անդամ Հրանտ Գրիգորյանին (գեներալ Մանվել Գրիգորյանի եղբոր որդին է): Ստեղծված իրավիճակի առնչությամբ փորձեցինք պարզաբանում ստանալ «Էջմիածնի ԲՈՒԱՏ» ընկերության տնօրեն Մանվել Վարդանյանից, սակայն ամեն անգամ նրա բջջային հեռախոսի զանգերին պատասխանում էին ինչ-որ մարդիկ՝ ասելով, թե պարոն Վարդանյանը սենյակում չէ: Սակայն լուրջ կասկածներ ունենք, որ մեր առաջին հեռախոսազանգին պատասխանողը հենց Մանվել Վարդանյանն էր, եւ ինքն էլ հայտարարեց, թե սենյակում չէ: Րոպեներ առաջ, երբ նրան կրկին զանգեցինք հեռախոսին մոտեցավ Հովո անունով ներկայացած մի տղամարդ. «Ախպեր ի՞նչ ա եղել: Մանվել Վարդանյանը հեռախոսը դրել ա զայրադկի ու դուրս ա եկել, զանգ եկավ դրա համար ես վեկալեցի: Ինքը հիմա դրսում ա»: Հովոյին խնդրեցինք հեռախոսը փոխանցել Մանվել Վարդանյանին. «Վայ ախպեր ջան, հենց նոր շեֆի հետ տեղ գնաց (նկատի ուներ Հրանտ Գրիգորյանին,-հեղ.): Նշենք, որ այս վիճակը ձեռնտու է նաեւ Հրանտ Գրիգորյանին եւ նա ամենեւին էլ վնասներ չի կրում, որ միկրոավտոբուսներն ու ավտոբուսները երթուղի դուրս չեն գալիս: Բանն այն է, որ «Քարավան» տաքսի ծառայությունը նույնպես իրեն է պատկանում եւ այսօր Էջմիածին-Երեւան երթուղին «սպասարկում» են միայն այս տաքսի ավտոմեքենաները, քանի որ կանգառում այլ տաքսիների չեն թողնում կայանել: