Այսօր ժամը 15:00-ին նախատեսած Հայ ազգային կոնգրեսի հանրահավաքն արդեն պետք է մեկնարկի, սակայն, ինչպես հայտնում է մեր թղթակիցը,  այս պահի դրությամբ քիչ մարդիկ են հավաքվել: Հավաքվածների ձեռքերում դրոշներ են, ոմանց մոտ` պաստառներ:  Մատենադարանի դիմացի հարթակին փակցված պաստառի վրա գրված է`  «Բարոյական հասարակության ազատագրումն ու հաղթանակը դեպի Հայ ազգային կոնգրես. Կոնգրեսը անկյունաքարն է նոր և օրինական Հայաստանի Հանրապետության»: Բեմահարթակը այս պահին զբաղեցրել են երիտասարդները, որոնք պարում ու թմբուկ են խփում: Մի քանիսն էլ թռուցիկներ են բաժանում: Հավաքվածներից մի քանիսի ձեռքերում Նիկոլ Փաշինյանի լուսանկարներն են: Իսկ որոշների մոտ` ՀՀ նախագահ Սերժ Սարգսյանի լուսանկարը` խաչ քաշած ու գրված` «Եթե արյան ծարավ չեք, թողեք հեռացեք»: «Հետքի» թղթակցի փոխանցմամբ` ներկա են նաև սփյուռքահայեր ու օտարերկրյա քաղաքացիներ: Օրինակ` մեկի մեջքին փակցված է գերմանիայի դրոշը: Ոստիկանները հիմնականում հավաքված են Մատենադարանի դիմացը` «պոնչիկանոցի» հարող տարածքում և չեն խոչընդոտում քաղաքացիներին: