«Սկսել էինք Ղարաբաղյան հարցը Ադրբեջանի տարածքային ամբողջականության շրջանակներում լուծելու ամրագրված սկզբունքից, ավարտել արդեն Լեռնային Ղարաբաղի ինքնորոշման իրավունքով»,-այսպես է բնութագրել այսօր Վարդան Օսկանյանը իր պաշտոնավարման 10 տարիների ընթացքում Ղարաբաղյան կարգավորման բանակցությունների ձեռքբերումը` իր «Անավարտ տասնամյակ» գրքի շնորհանդեսի ժամանակ: «Ինչքան էլ մադրիդյան փաստաթուղթը իր մեջ պարունակում է բազմաթիվ հարցեր, որոնք մեզ համար թերեւս անընդունելի են եւ պետք է դեռ աշխատել ու քննարկել, բայց մի սկզբունքի հարցով ես գոնե հանգիստ եմ զգում, որ առաջին անգամ փաստաթղթային տեսք ստացավ այն, ինչին մենք ձգտել ենք` սեւով սպիտակի վրա նշվում է, որ Լեռնային Ղարաբաղն ինքը պիտի որոշի իր ճակատագիրը` ինքնորոշման իրավունքի հիման վրա»,-ընդգծել է Վարդան Օսկանյանը: Նախկին արտգործնախարարի խոսքերով, «այն, ինչ այսօր կա փաստաթղթային տեսքով, լավ հիմք է ծառայում հասնելու նրան, ինչին որ ձգտել  ենք` Լեռնային Ղարաբաղի ամբողջական ինքնորոշմանը»: Նա նաեւ շարունակել է, որ փաստաթուղթն առնվազն լավ հիմք է տալիս ցանկացած պահի, եթե ճիշտ դիվանագիտություն վարվի, դիվանագիտորեն միշտ գտնվել բարենպաստ իրավիճակում: Ներկաների խնդրանքով, Վ.Օսկանյանն անդրադարձել է նաեւ տարածքների թեմային: Նա տեղեկացրել է, որ բանակցություններում միշտ էլ առկա էր տարածքների հարցը: «Կարգավորման գործընթացում առանց այդ տարածքները ընդհանուր բանաձեւի մաս դարձնելու ուղղակի հնարավոր չի բանակցել: Կամ ընդհանրապես չպիտի բանակցել, կամ, եթե բանակցությունների մեջ ես` բնականաբար առնչվում ես այդ հարցերի հետ»,-շեշտել է նա: Վարդան Օսկանյանը խոսել է նաեւ տարածաշրջանային ներկա զարգացումներից, որոնցից մտահոգիչը թերեւս համարում է հայ-թուրքական հարաբերությունների բարելավման գործընթացում տեղ գտած զարգացումները: Նրա համոզմամբ, հայ-թուրքական օրակարգում այսօր Լեռնային Ղարաբաղի հարց չկա եւ չի եղել, սակայն, ըստ նրա, «մեզանից անկախ այսօր այդ առնչությունները ստեղծվել են», ինչում էլ վտանգ է տեսնում պարոն Օսկանյանը: «Ճիշտ է մեր իշխանությունները երբեք չեն գնա նրան, որ թուրքերի հետ Ղարաբաղի հարց քննարկեն, բայց մենք մտել ենք մի այնպիսի գործընթացի մեջ, որի վրա ազդեցությունն ու վերահսկողությունն արդեն կորցրել ենք»,-այս կարծիքին է Վ.Օսկանյանը, ով գտնում է, որ ապրիլի 22-ին հայտարարված համաձայնությունից հետո Թուրքիան «ուզում է Ղարաբաղի հարցում եւս ինչ-որ մի բան ստանալ, որպեսզի բացեն սահմանը եւ ադրբեջանական կողմը դժգոհ չլինի»: «Մեր դիվանագիտության հիմնական թերացումն այսօր կայանում է նրանում, որ այն գործընթացը, որ կար եւ շարունակվում է այսօր, գաղտնի բանակցություններից վերածեցին հրապարակայինի: Երբ բանակցությունները գաղտնի էին` թուրքերը հնարավորություն չունեին ոչ բովանդակությունը, ոչ գործընթացը շահարկել, այսօր, երբ հրապարակային, եւ բոլորը հետաքրքրություն են ցուցաբերում, այդ ամենը մեր օգտին չի: Թուրքերի` գործընթացը շահարկելու քաղաքականությունը շատ ավելի արդյունավետ է»,-ավելացրեց նախկին արտգործնախարարը: