Կենտրոն եւ Նորք-Մարաշ համայնքների ընդհանուր իրավասության դատարանում, Գագիկ Պսոսյանի նախագահությամբ, շարունակվում է Գոհար Վեզիրյանի դատաքննությունը: Հիշեցնենք, որ «Չորրորդ իշխանություն» օրաթերթի լրագրողը մեղադրվում է անցյալ տարվա օգոստոսի 6-ին` Սմբատ Այվազյանի դատավարության ժամանակ, «Դատարանի նկատմամբ անհարգալից վերաբերմունք» դրսեւորելու համար: Այսօրվա նիստում պետք է ցուցմունք տար Գոհար Վեզիրյանը: Սակայն վերջինս, օգտվելով իր իրավունքից, հրաժարվեց ոչ միայն ցուցմունք տալուց, այլեւ հարցերին պատասխանելուց: «Որովհետև մեղադրանքը շինծու է և արհեստածին, իսկ քրեական գործում առկա են բոլոր ապացույցները, որոնք փաստում են, որ ես որևէ վիրավորական արտահայտություն թույլ չեմ տվել դատարանի հասցեին »,- ասաց լրագրողը: Մեղադրող Լեւոն Չարխիֆալակյանը միջնորդեց, որպեսզի դատարանում, որպես Վեզիրյանի հանցանքը հիմնավորող ապացույցներ, հետազոտվեն նաեւ մեղադրական եզրակացությունում չներառված մի քանի փաստաթղթեր, որոնք են` ոստիկանության Կենտրոնի բաժնում հանցագործության մասին հաղորդում ընդունելու, լրագրողին բերման ենթարկելու և դատարանում արգելանքի տակ վերցնելու արձանագրությունները: Պաշտպան Հովիկ Արսենյանն առարկեց այս միջնորդության դեմ` նշելով, որ Սմբատ Այվազյանի դատավարության ձայնագրության վերծանման հետազոտության ընթացքում պարզ է դարձել, որ դատավոր Գագիկ Ավետիսյանը լրագրողին արգելանքի տակ վերցնելու որոշում չի կայացրել, և դա կարգադրիչների կամայական գործողությունների արդյունքն է: Ավելին` կարգադրիչները, ինքնակամ արգելանքի վերցնելիս, Վեզիրյանի նկատմամբ գործադրել են բռնություն, ինչը ապացուցվել է նաև դատաբժշկի փորձագիտական եզրակացությամբ: Դատավորը հարցրեց` այդ դեպքում ինչո՞ւ քրեական գործ չի հարուցվել: Փաստաբան Արսենյանն էլ պարզաբանեց, որ նախաքննական մարմինը կարգադրիչների գործողությունները համարել է իրավաչափ: Մյուս կողմից, Գ. Վեզիրյանը նկատեց, որ դատախազ Չարխիֆալակյանն անձամբ իրեն բառացիորեն ասել է, թե կարգադրիչների գործողությունների իրավաչափ լինել-չլինելու հանգամանքը այս գործում չի կարող քննվել, քանի որ դա մեղադրանքի ծավալից դուրս է: Հետեւաբար, լրագրողը տարակուսեց, թե ինչպես է այժմ դատախազը միջնորդում, որպեսզի դրանք, որպես լրացուցիչ ապացույց, ներառվեն գործում: «Ինձ ոչ թե բերման են ենթարկել, այլ շատ են խնդրել, որ իրենց հետ այցելեմ ոստիկանական բաժանմունք: Ավելին` մինչ այդ նույնիսկ հրավիրել են սուրճ խմելու, և դրանից հետո միասին գնացել ենք ոստիկանություն»,- ասաց Գոհար Վեզիրյանը` զարմանալով, որ կազմվել է բերման ենթարկելու մասին արձանագրություն: Դատարանը, լսելով կողմերին, մեղադրողի միջնորդությունը բավարարեց մասնակի եւ որոշեց հետազոտել հանցագործություն կատարելու մասին հաղորդումը եւ Վեզիրյանին բերման ենթարկելու վերաբերյալ արձանագրությունը: Դատախազի կողմից հրապարակվեցին հիշյալ փաստաթղթերը: Այնուհետեւ պաշտպան Հովիկ Արսենյանը միջնորդեց, որպեսզի դատարան հրավիրվեն եւ որպես վկա հարցաքննվեն առնվազն երեք անձ`Հելսինկյան ասոցիացիայի նախագահ Միքայել Դանիելյանը, «Հայք» թերթի լրագրող Արտակ Եղիազարյանը և «Ազատություն» ռադիոկայանի թղթակից Հովհաննես Շողիկյանը: «Այս մարդիկ նախաքննության ընթացքում իբրեւ վկա հարցաքննվել են: Սակայն, չգիտես ինչու, նրանք չեն դատակոչվել»,- պարզաբանեց փաստաբանը: Մեղադրողը ներկայացրեց առարկություն` շեշտելով, որ «նախաքննական մարմնին տվյալ անձանց տված ցուցմունքները չեն առնչվում մեղադրանքին, ապացուցողական նշանակություն չունեն, ուստի իմաստ չկա նրանց դատարանում հարցաքննել»: Դատավոր Գագիկ Պողոսյանը հետաքրքրվեց, թե «արդյոք պաշտպանական կողմը կարո՞ղ է դատարանին հայտնել նշյալ անձանց բնակության հասցեները, որպեսզի հնարավոր լինի նրանց հրավիրել»: «Ձեր առջեւ` սեղանին դրված քրեական գործում, նրանց հասցեները գրված են»,- հակադարձեց պաշտպանը: Այնուամենայնիվ, դատարանը միջնորդությունը մերժեց` «նկատի ունենալով, որ պաշտպանական կողմը ո´չ նշեց տվյալ անձանց բնակության հասցեները, ո´չ էլ մանրամասնեց, թե կոնկրետ ինչ հանգամանք է պարզվելու նրանց հարցաքննությամբ»: Ի պատասխան` Հովիկ Արսենյանը հայտարարեց, որ Սմբատ Այվազյանի դատավարությանը ներկա են եղել 50-ից ավելի անձինք, մինչդեռ մեղադրանքի հիմքում դրվել են միայն «վկա-կարգադրիչների շատ սուբյեկտիվ ցուցմունքները»: Ուստի պաշտպանը միջնորդեց դատավարությունը հետաձգել, որպեսզի ինքը ներկայացնի գրավոր միջնորդություն` մի շարք անձանց, որպես միջադեպի ականատես-վկա, դատարան հրավիրելու համար: Դատավորի կոնկրետացման պահանջով` Արսենյանը թվարկեց չորս հրավիրյալի անուն-ազգանուն` Ռաֆիկ Մկրտչյան, Գագիկ Ներսիսյան, Լյովա Եղիազարյան և Լյովա Սիսակյան: «Գրավոր միջնորդության մեջ ես կնշեմ նրանց բնակության հասցեները,- ասաց փաստաբանը եւ հավելեց: - Նրանց հարցաքննությունն անհրաժեշտ է գործի օբյեկտիվությունն ու բազմակողմանիությունն ապահովելու համար: Նրանց հարցաքննությամբ եւս մեկ անգամ կփաստվի, որ Գոհար Վեզիրյանը կապ չունի իրեն մեղսագրվող արարքի հետ»: Դատավորը հարցրեց, թե պաշտպանական կողմը կարո՞ղ է ներկայացնել այնպիսի ապացույցներ, որոնք կհիմնավորեն, որ փաստաբանի կողմից հրավիրվող մարդիկ ներկա են եղել Սմբատ Այվազյանի դատավարությանը, իսկ Գոհար Վեզիրյանի դատավարություններին չեն մասնակցի: «Այո, ես կարող եմ ներկայացնել լուսանկարներ, որ նրանք միջադեպին ականատես են եղել: Ինչ վերաբերում է Վեզիրյանի դատավարությանը ներկա չլինելուն, նրանց տեսնելով` բոլորդ էլ կհամոզվեք, որ այս դահլիճում նրանք չեն եղել»,- վստահեցրեց Հ. Արսենյանը: Ֆոտոլրագրող Գագիկ Շամշյանն էլ հավելեց, որ ինքը լուսանկարահանել է Գոհար Վեզիրյանի բոլոր դատական նիստերը, այդ թվում` նիստերի դահլիճը, ուստի այդ լուսանկարների միջոցով շատ հեշտ հնարավոր կլինի պարզել` հրավիրվող անձինք երբեւէ Վեզիրյանի դատավարությանը ներկա եղե՞լ են, թե՞ ոչ: Դատավոր Գագիկ Պողոսյանը մերժեց նաեւ այս միջնորդությունը` գտնելով, որ «տվյալ հանգամանքը հիմնավորել օբյեկտիվորեն հնարավոր չէ»: Դատարանը հայտարարեց, թե անցնում է վիճաբանությունների փուլին, ուստի մեղադրող Չարխիֆալակյանի խնդրանքով` նիստը հետաձգեց, որպեսզի վերջինս պատրաստի մեղադրական ճառը: Դատավարությունը կշարունակվի մայիսի 14-ին: