Վարչապետ Տիգրան Սարգսյանն այսօր աշխատանքային այցով մեկնել է Շիրակի մարզ` Գյումրի։ Նա ծանոթացել է «Մուշ» եւ «Անի» թաղամասերի կառուցապատման աշխատանքներին, որից հետո տեղի է ունեցել աշխատանքային խորհրդակցություն` ԼՂՀ վարչապետ Արա Հարությունյանի, ՀՀ փոխվարչապետ, տարածքային կառավարման նախարար Արմեն Գեւորգյանի, ՀՀ մարզպետների, համապատասխան նախարարությունների եւ գերատեսչությունների ներկայացուցիչների մասնակցությամբ։ Կառավարության մամլո ծառայության հաղորդմամբ` քննարկվել է աղետի գոտում բնարանային շինարարության, ինչպես նաեւ ՀՀ մարզերի եւ Արցախի վարչական շրջանների միջեւ համագործակցության շրջանակներում իրականացվող աշխատանքների ընթացքը։ Առաջին հարցի վերաբերյալ ՀՀ քաղաքաշինության նախարարի տեղակալ, հանրապետության գլխավոր ճարտարապետ Նարեկ Սարգսյանը զեկուցել է, որ այս տարի նախատեսվում է ավարտին հասցնել 22 շենքի, կամ 1320 բնակարանի, Լոռիում եւ Սպիտակում` շուրջ 900 բնակելի տների շինարարությունը։ «Գլենդել Հիլզ» ՓԲԸ-ի տնօրենների խորհրդի նախագահ Էդվարդ Մելիքյանը տեղեկացրել է, որ ընկերության կողմից Գյումրու «Մուշ» եւ «Անի» թաղամասերի կառուցապատման շրջանակներում ստեղծվել է շուրջ 300 աշխատատեղ` 90-100 հազար դրամ միջին աշխատավարձով, իսկ աշխատանքների ողջ ծավալի իրացման դեպքում աշխատատեղերի թիվը կհասնի 1500-ի։ Վարչապետը աղետի գոտու բնակարանային շինարարարության աշխատանքների ընթացքը գնահատել է բավարար` միաժամանակ ուշադրություն հրավիրելով կառուցվող բնակարանների գնագոյացման հանգամանքների վրա, բնակչության համար բնակարանները հնարավորինս մատչելի դարձնելու նպատակով։ ԼՂՀ վարչապետ Արա Հարությունյանը շնորհակալություն է հայտնել Հայաստանի ղեկավարությանը, մարզպետներին` համագործակցության համար, որը, ըստ նրա, մեծապես նպաստում է ԼՂՀ տնտեսության զարգացմանը։ Խոսելով փոխգործակցության հետագա ծրագրերի մասին, նա կարեւորել է բուհերի, դպրոցների միջեւ անմիջական կապերի ստեղծումը, մասնագիտական աջակցությունը, համագործակցությունն աստիճանաբար նաեւ զբոսաշրջության, բիզնեսի բնագավառներ տեղափոխելու խնդիրը։ Ամփոփելով խորհրդակցության արդյունքները` Տիգրան Սարգսյանն իրականացված աշխատանքների ընթացքը դրական է գնահատել։ Միաժամանակ, վարչապետն անդրադարձել է մի շարք խնդիրների, որոնք, ըստ նրա, կարեւոր են նաեւ կառավարության հակաճգնաժամային ծրագրի տրամաբանության տեսակետից։ Վարչապետը կարեւորել է ճգնաժամի պայմաններում հանրապետության բնակչության ամառային հանգիստը Հայաստանում եւ ԼՂՀ-ում կազմակերպելուն ուղղված միջոցառումները։ Նա մարզպետներին հանձնարարել է, իսկ ԼՂՀ վարչապետին առաջարկել` կարճ ժամկետում տեղեկատվություն ներկայացնել ՀՀ մարզերում եւ Լեռնային Ղարաբաղում բնակչության հանգստի եւ զբոսաշրջության առկա պայմանների ու հնարավորությունների վերաբերյալ։ Վարչապետը մարզպետներին հանձնարարել է նաեւ գնահատել խաղողի մթերման այս տարվա ծավալներն իրենց մարզերում, խաղողի արտահանումն առավել արդյունավետ կերպով իրականացնելու համար։ Տիգրան Սարգսյանը շեշտադրել է նաեւ սոցիալական նպաստների խնդիրը, որը Սյունիքի մարզ կատարած աշխատանքային այցի ժամանակ կարեւորվել էր ՀՀ նախագահի կողմից։ Նա հանձնարարել է մարզպետներին` ուշադրության կենտրոնում պահել այդ խնդիրը, միջոցներ ձեռնարկել նպաստ ստացող ընտանիքների ցուցակները ճշգրտելու, անօրինական նպաստառուներին բացահայտելու համար, որպեսզի այդ միջոցները հասնեն հենց այն անապահով խավերին, որոնք իսկապես ունեն դրա կարիքը: