Արմավիրի մարզի 20 համայնքներում չեն կարողացել հավաքել հարկերը եւ ապահովել մինչև  10 տոկոս եկամուտ: Այդ գյուղերից մեկը՝   Արտաշարը առաջին եռամսյակում բյուջե է մուտքագրել ընդամենը 400.000 դրամ : «Պատճառն այն է, գյուղացին էս սեզոնին վաճառելու ոչինչ չունի, որ հարկ տա: Եթե ես դա գիտեմ, ոնց գնամ- ասեմ` եկամուտ ես ստացել` հողի հարկը տուր: Էդ 400.000-ն էլ թոշակառուներից ենք հավաքել: Բացատրում ենք, որ  չվճարելու դեպքում մի շարք անհարմարություններ կստեղծվեն գյուղի համար, որից հիմնականում կտուժի հենց ինքը` գյուղացին: Բացատրածս տեղ է հասնում. ովքեր կարողանում են, մի քանի կոպեկ տալիս են, իսկ ովքեր ի վիճակի չեն, չենք պարտադրում»,- ասաց Արտաշար համայքի ղեկավար Մանվել Օհանյանը: Գյուղապետ ասում է, որ տարեկան բյուջեի կատարողականում ոչ մի տարի չեն թերացել: Իրենց համար դժվարն առաջին կիսամյակն է, երբ  գյուղում  աճող հիմնական մշակաբույսերը`ձմերուկն ու սեխը,  նոր-նոր կանաչում են: «Ամեն տարվա առաջին կեսին այս խնդիրն ունենում ենք: Արտաշարը մի համեմատեք Էջմիածնի գյուղերի հետ: Մեր հողը  բարեբեր չէ  այլ կուլտուրաներ աճեցնելու համար: Եթե Էջմիածնի տարածաշրջանի գյուղացիները փետրվարի վերջից արդեն կարողանում են թարխունը և այլ կանաչիներ շուկա արտահանել, դա դեռ չի նշամնակում, որ մարզի բոլոր գյուղերում գյուղացու վիճակը լավանում է: Մեր գյուղում բերքը հասնում է օգոստոսին: Մինչև  դա  չիրացվի` գյուղացուն փող որտեղից»,- ասաց գյուղապետը, հավելելով, որ հող մշակելը դարձել է թանկ հաճույք: Ըստ նրա`  բերքը վաճառելուց հետո էլ գյուղացու ձեռքին ոչինչ չի մնում. «Բանկից վերցրած վարկերն է մարում, գյուղատնտեսական սեզոնի ընթացքում կուտակած պարտքերը փակում, որոնց առյուծի բաժինը ոռոգման ջրինն ու պարարտանյութինն է, ու նորից մնում դատարկաձեռն: Էլ ես ինչ խղճով գնամ ու հողի հարկը պահանջեմ»,- գյուղացիների` բյուջեին պարտք մնալու պատճառն այսպես հիմնավորեց համայնքապետ Օհանյանը: Պատկերը նույնն է նաև մնացած 19 համանյքներում, որոնցից միայն  Հովտամեջն է, որ Էջմիածնի տարածաշրջանի գյուղերից է, մնացածը` Արմավիրի համայնքներից են, որոշներն էլ` սահմանամերձ: Վերջիններս նաև սահմանային հողերի մշակման խնդիր ունեն, որը թույլ չի տալիս լիարժեք մշակել հողն ու լիարժեք եկամուտ ստանալ: Իսկ ստացած եկամուտով չեն կարողանում պարտքերը մարել, այդ թվում և` հողի հարկը: Արմավիրի մարզպետարանի  ֆինանսական վարչության պետ Վարազդատ Մկրտչյանը համամիտ է բյուջետային հավաքագրումների թերացման`գյուղապետերի հիմնավորումներին: Նա միաժամանակ հույս հայտնեց, որ  համայնքների ղեկավարները հավաքագրման խոսուն ցուցանիշ կարող են ներկայացնել միայն հունիսից հետո, երբ բանջարաբոստանային որոշ կուլտուրաներ  իրացված կլինեն: Եթե գյուղապետերի արդարացումները համոզել են մարզպետարանի գլխավոր ֆինանսիստին, ապա մարզպետ Աշոտ Ղահրամանյանին` ոչ այնքան: «Եթե  պետությունը համայնքների նկատմամբ իր պարտավորություններում չի թերանում, այսինքն` ժամանակին դոտացիա է տալիս, նշանակում է` համայնքներն էլ իրենց պարտավորություններում պետք է կարգապահ լինեն»,- ասել է մարզպետը մարզխորհրդի վերջին նիստի ժամանակ: Ա.Ղահրամանյանը, հավաքագրման մինչև 10 տոկոս արդյունք ցույց տված գյուղապետերին ժամանակ է տվել. եթե առաջին կիսամյակի կտրվածքով, այսինքն` մինչև հունիսի վերջ հավաքագրումն ընթանա նույն տեմպերով, ինքը հանդես կգա նրանց նկատմամբ անվստահության միջնորդությամբ: Հայկուշ Ասլանյան