Կապանի Սրբ Մեսրոպ Մաշտոց եկեղեցու կիրակնօրյա դպրոցի սան Ռաֆայել Ղոնյանը 5-րդ դասարանում է սովորում:  Ի տարբերություն միջնակարգ դպրոցի, այստեղ չեն գնահատում, խրախուսում են, ինչը գոհացնում է Ռաֆայելին: «Օրինակ, երբ նկարում ենք, ամսվա վերջին լավ նկարները կախում են պատից ու նվերներ տալիս»,-ասում է Ռաֆայելը: Ասեղնագործություն, նկարչություն, եկեղեցու, հայ ժողովրդի  պատմություն, կրոն  եւ այլ առարկաներ են դասվանդվում այստեղ:  Այս դպրոցն ըստ աշակերտների, իրենց ամենօրյա դասերին  չի խանգարում շաբաթական  4 անգամ են այստեղ հաճախում, շփվում միմյանց հետ, նաեւ  ընմիջումներին թխվածքաբլիթ  վայելում ու մեկ բաժակ կակաո ըմպում: Սա, ի դեպ, անվճար է: Եթե կիրակնօրյա դպրոցի մեկնարկին` մարտին 12 սան էր հաճախում, ապա այսօր 67 սան կա: Ցանկացողներ շատ կան, բայց ֆինանսական սուղ միջոցները թույլ չեն տալիս ավելի մեծ թվով երեխաների ներգրավել:  Կապանի ու Քաջարանի հոգեւոր հովիվ Գալուստ վարդապետ Դարբինյանն ասում է, որ դպրոցը կանգնած է փակման եզրին: 3 ամսվա գործունեությունից հետո եղած դրամական միջոցները սպառվել են: «Մայիսի վերջից դպրոցը փակվելու է: Գումարները չեն բավականացնում, եկեղեցին հնարավորություն չունի դպրոցը պահելու, դա պիտի համայնքն ու ժողովուրդը անեն: Բացման օրը շատերը խոստացան օգնել, բայց մինչեւ օրս ռեակցիա չեն տալիս, չեն արձագանքում»,-ասում է վարդապետը: Դպրոցի տարածքը եկեղեցու սեփականությունն է: Տարածքի նորոգման ու հետագա գործունեության համար գումարներ տրամադրել են Զանգեզուրի պղնձամոլեբդինային կոմբինատն  ու  «Վորլդ Վիժն» կազմակերպության Կապանի զարգացման ծրագիրը: Ուսուցիչներին ու այլ աշխատողներին աշխատավարձ է վճարվել, հոգացել են երեխաների սննդի հարցերը: Ըստ Գալուստ վարդապետ Դարբինյանի ամսական 150-170 հազար դրամ է անհրաժեշտ դպրոցի գործունեության համար: «Ուսուցիչներից մեկը եկավ, մի ցուցակ բերեց  գրենական պիտույքների համար, մի 120-130 հազար դրամի պարագաներ պիտի առնեմ, փող չունեմ, ինչ անեմ»,-հուսահատված ասում է հոգեւոր հայրը: Ընդհանրապես կիրակնօրյա դպրոցներում ուսուցիչներն անհատույց են աշխատում, այսինքն ազատ ժամանակը նվիրաբերում են եկեղեցուն: Վարդապետը համամիտ է, սակայն որպես խրախուսանք հենց սկզբից հոնորար է տվել ուսուցիչներին: «Ճիշտ է սիմվոլիկ  գումար է` 20 հազար դրամ, բայց էլի մի ցավի կօգնի: Եթե լինեն նվիրյալներ, ավելի լավ,բայց չեն լինի,  անվճար մեկ-երկու ամենաշատը 10 անգամ կպարապեն: Ես կողմնակից եմ վճարման, էդպես մարդը պատասխանատու է զգում իրեն»,-ասում է Գալուստ վարդապետ Դարբինյանը: Սյունյաց թեմի փոխառաջնորդն է եղել կիրակնօրյա դպրոցում, իր երախտիքի խոսքն է ասել` խոստանալով օգնել որեւէ կերպ: Վարդապետը  չի դիմել Մայր աթոռին` աջակցության խնդրանքով: «Ես չգիտեմ նման մի դեպք, մի պարագա, որ Մայր աթոռը օգնած լինի: Նման դպրոցը, էլի եմ ասում, ինքուրույն, բարերարների միջոցով պիտի գոյատեւի»,-ասում է Գալուստ վարդապետ Դարբինյանը: Հոգեւոր սպասավորը ակնկալում է բարի մարդկանց օգնությունը, որպեսզի դպրոցի չփակի դռները ու համոզված է, որ կգտնվեն նման մարդիկ,  իսկ սաների  աղոթքը առ Աստված կուղեկցի բարի մարդկանց: Հ. Գ. Նյութն արդեն պատրաստ էր, երբ  ԵԱՀԿ Սյունիքի զարգացման ծրագրերի ղեկավար Գարիկ Չիլինգարյանը Հետքին տեղեկացրեց, որ ԵԱՀԿ-ի կենտրոնական գրասենյակն ամեն տարի` Վիեննայում կազմակերպում է բարեգործական պարահանդես: Այս անգամ ողջ հասույթը, հավանաբար  նպատակաուղղվելու է Կապանին: Արդեն ծրագիրը ներկայացվել է:  Դրանով կլուծվի կիրակնօրյա դպրոցի աշխատակիցների մեկ տարվա աշխատավարձի հարցը, ձեռք կբերվեն սեղան-աթոռներ, կտեղադրվեն համակարգիչներ` ինտերնետ ցանցով, ինչպես նաեւ այլ անհրաժեշտ սարքավորումներ կհատկացվեն: