Մայիսի 17-ն տեղի ունեցավ «Մեկ կադր, մեկ րոպե» կինոփառատոնի 7-րդ շրջանի բացումը : Այս տարի գրանցվել է մասնակիցների ռեկորդային թիվ` 106-ը: Այսօր ժամը 19:30-ին սկսվում է փառատոնի մրցութային փուլը: Մինչեւ մայիսի 24-ը ՆՓԱԿ-ում (Նորարար փորձառական արվեստի կենտրոն) ամեն օր կցուցադրվեն  մեկ րոպեանոց  90  ֆիլմեր, տասնյակ արտամրցութային կարճամետրաժ եւ մի քանի լիամետրաժ  ֆիլմեր: Այս տարի փառատոնը միավորել է Հայաստանի, ԱՊՀ եւ Եվրոպական մի շարք երկրների փորձարարական կինոարտադրողների բազմաբնույթ ֆիլմեր: Ամեն օր  ժամը 12:00 -20:00  ՆՓԱԿ-ում կցուցադրվեն ֆիլմեր, իսկ 20:00-ից կսկսվեն ֆիլմերի մասին բանավեճերն ու քննարկումները: Փառատոնի շրջանակում նաեւ կանցկացվեն վարպետության դասեր: Փառատոնի ժյուրիի կազմում ընդգրկված են Կինոարտադրության ռեժիսոր Արա Շիրինյանը, ռեժիսոր Արզուման Հարությունյանը,հեռուստալրագրող Նունե Ալեքսանյանը, գրականագետ, բանասիրական գիտությունների դոկտոր Լիլիթ Արզումանյանը, ինչպես նաեւ կինոգետ, թարգմանիչ եւ խմբագիր Զավեն Բոյաջյանը: Այս տարի  սահմանված է  «Լրագրողների համակրանք» մրցանակը,որը շնորհելու են մի խումբ լրագրողներից կազմված ժյուրին, նաեւ, ինչպես ամեն տարի, լինելու է մրցանակ հենց մասնակիցների կողմից` «Հեղինակների ձայն» մրցանակը: Այս տարի փառատոնի նախագահ Գագիկ Ղազարէն իր կողմից շնորհելու է «Կինո առանց սահմանների» անվանակարգում մրցանակ: Կան նաեւ ավանդական  «Մեկ կադր, մեկ րոպե» անվանակարգում մրցանակ եւ «Կարճ ֆիլմերի» անվանակարգում սահմանված մրցանակ:  Փառատոնի ողջ ընթացքում մուտքն ազատ է բոլորի համար: