Խորենացի 29 հասցեում` Ոսկու շուկայի հարեւանությամբ (դեմացի մայթին), այսօր` ժամը 12:30-ի սահմաններում, հնչել են կրակոցներ:  Երևան քաղաքի ոստիկանապետ Ներսես Նազարյանի գլխավորությամբ այժմ դեպքի վայրում են բարձրաստիճան ոստիկաններ և կարմիր բերետավորներ: Սակայն ոստիկանները կատարվածի մասին առայժմ պաշտոնապես որևէ տեղեկատվություն չեն տրամադրում: Մեր թղթակցին  ոստրկաններից մեկը փոխանցել է, որ զոհեր չկան, մեկ անձ հրազենային վնասվածքներով տեղափոխվել է Երևանի Պռոշյանի թիվ 3 կլինիկական հիվանդանոց: Հանցագործի և տուժողի ինքնությունը դեռևս հայտնի չէ: Ըստ նախնական տեղեկությունների` կրակողը եղել է մեկ անձ, ով կրակոցներն արձակելուց հետո անմիջապես դիմել է փախուստի: Հենց այս պահին ոստիկանության փորձաքրեագիտական վարչության աշխատակիցները դեպքի վայրում զննություն են կատարում: Հայտնաբերվել են արյան հետքեր, «Marllboro» տեսակի ծխախոտի կիսադատարկ տուփ և տարբեր հեռավորությունների վրա ընկած` 5 գնդակի պարկուճներ: Մանրամասները կներկայացնենք փոքր ինչ ուշ: Լուսանկարները` Գագիկ Շամշյանի