2008 թ. Հայաստանի բրոնզե մեդալակիր Կապանի «Գանձասարը» Հայաստանի 2009 թ. առաջնության մեկնարկային խաղերում իրար հետևից պարտություններ կրեց, ինչի արդյունքում ապրիլին պաշտոնանկ արվեց թիմի գլխավոր մարզիչ Սամվել Պետրոսյանը: Վերջինիս պարտականությունները մինչեւ անցած շաբաթ կատարում էին նրա օգնականները: Գլխավոր մարզչից հեռանալուց հետո «Գանձասարը» դրսում հաղթանակ տարավ «Արարատ»-ի նկատմամբ: Հերթական հաղթանակը գրանցվեց մայիսի 24-ին` Երեւանի «Բանանց»-ի հետ մրցապայքարում: 

«Գանձասար» ակումբի տնօրինությունը պայմանագիր է կնքել Սլավա Գաբրիելյանի հետ, ով էլ նշանակվել է գլխավոր մարզչի պաշտոնակատար: Ինչպես տեղեկացրին ակումբից, ՈՒԵՖԱ-ի որոշման համաձայն, գլխավոր մարզիչները պետք է ունենան հատուկ արտոնագիր, ու այդ նպատակով պարբերաբար կազմակերպվում են դասընթացներ:

Սլավա Գաբրիելյանը չունի այդ արտոնագիրը, ուստի նա դեռեւս գլխավոր մարզչի պաշտոնակատար է: Վերջինս ավարտել է Մոսկվայի մարզական դպրոցը, երկար տարիներ ընդգրկված է եղել Երեւանի «Արարատի» մարզչական շտաբում, ապա գլխավորել է «Լեռնային Արցախ» թիմը, աշխատել է նաեւ Լիբանանում: Ինչ վերաբերում է «Գանաձասար»-«Բանանց» խաղին, ապա առաջին իսկ վայրկյաններից աչքի ընկան կապանցիները: Դեռ չէին հասցրել հրապարակել թիմերի կազմերը, երբ խաղի 3-րդ րոպեին Վահե Դավթյանը գրավեց մրցակցի դարպասը: Երկրորդ խաղակեսում, գանձասարցիները կարծես թուլացան, ու բազմիցս գոլային պահեր էր ստեղծվում «Գանձասարի» կիսադաշտում: Ի վերջո, հյուրերից Տիգրան Հովսեփյանին հաջողվեց հավասարեցնել խաղի հաշիվը:

Բայց երկրորդ խաղակեսի ավարտից առաջ, գնդակը 2-րդ անգամ հայտնվեց «Բանանց»-ի դարպասում: Վերջինիս գլխավոր մարզիչ Արմեն Գյուղբուդաղյանցի խոսքով, հաղթանակը չէր խանգարի մրացաշարային աղյուսակի 3-րդ հորիզոնականում գտնվող «Բանանց»-ին, բայց խաղը մնում է խաղ: Իսկ հանդիպման ավարտն ազդարարող սուլիչի ձայնը ոգեւորեց թե' կապանցի ֆուտբոլիստներին, թե' նրանց երկրպագուներին: Այս մրցաշրջանում մեր մարզադաշտում դեռեւս հաղթանակ չէր գրանցվել: Սլավա Գաբրիելյանը արձանագրված հաղթանակը բոլորինն է համարում, ու չնայած նոր-նոր է անցել աշխատանքի, բայց թիմի իրավիճակը գնահատում է բավարար. «Թերեւս հաղթանակի պատճառը կամքն էր, «Բանանց»-ը ուժեղ թիմ է, ավելի մարտունակ»,-ասաց նոր մարզիչը: Մրցաշրջանի մեկնարկից առաջ «Գանձասարի» կազմում էին ընդգրկվել բազմաթիվ լեգեոներներ, որոնց մի մասը` Սերբիայից: Սակայն աստիճանաբար ակումբը հրաժարվեց արտասահմանցիների ծառայություններից: Մի քանի խաղացող էլ հեռացվեցին նախկին մարզչի հետ: «Գանձասար»-ում այսօր 12-13 խաղացող կա, ինչը դժվարացնում է աշխատանքը: Կիրակի, խաղից առաջ լեգեոներից ռումինացի Վիգել Մարշելավելլին հրաժարվեց խաղադաշտ մտնել: Սլավա Գաբրիելյանի խոսքով, ինքը ֆուտբոլիստին ընդգրկել էր փոխարինողների կազմում: Մեկ այլ աղբյուրի հավաստմամբ, ռումինացին ընտանեկան պատճառներով է հրաժարվել խաղից: Ամեն դեպքում Սլավա Գաբրիելյանը այլեւս չի աշխատի նրա հետ. «Ես հարաժարվում եմ նրա ծառայություններից: Ինքը լավ գիտեր, որ փոխարինող չունեմ, այսօր ֆուտբոլիստները մի կերպ դիմացան` հոգնել էին վերջում»,-ասաց մարզիչը: «Գանձասարը» առաջիկայում կանցնի «սելեկցիոն» աշխատանքների, այսինքն` աշխատանքներ կտարվեն թիմի կազմը համալրելու ուղղությամբ: Ակումբի ղեկավարները մտադիր են մինչեւ ամառ` Եվրոպայի լիգայի խաղարկությունը, ուժեղացնել թիմի կազմը:

Սլավա Գաբրիելյանն արդեն նախնական պայմանավորվածություններ ունի որոշ խաղացողների հետ, բայց գտնում է, որ «Գանձասարը» պետք է համալրվի տեղացի խաղացողներով. «Չեմ ասում հրաժարվենք լեգեոներներից, իրենք էլ են պետք, ուղղակի լավ խաղացողներ պիտի լինեն: Իսկ ամենալավը էն կլինի, որ երկու-երեք տարի անց «Գանձասարը» համալրված կլինի տեղացի ֆուտբոլիստներով: Ղարաբաղում էդպես արեցի, գուցե ղարաբղցիներ էլ հրավիրեմ : Բայց հիմնականում «Գանձասար» ակումբի պատանեկան թիմերից պիտի համալրենք հիմնական կազմը»,-ասաց Ս. Գաբրիելյանը: Մնում է հուսալ, որ «Գանձասար»-ը աղյուսակի վերջին հորիզոնականներից գոնե մի քիչ վեր կբարձրանա: