Հայաստանի Մարդու իրավունքի պաշտպանի գրասենյակը տարածել է հաղորդագրություն, որում ասվում է. Մայիսի 31-ի Երևանի ավագանու ընտրություններին ՀՀ մարդու իրավունքների պաշտպանի հաստատությունը ստացել է մեկ տասնյակից ավելի բանավոր դիմում-բողոքներ, որոնք հիմնականում վերաբերել են հետևալ խնդիրներին. - քվեարկությանը մասնակցելու նպատակով միկրոավտոբուսներով քաղաքացիներին տեղափոխում են ընտրատեղամասեր և հորդորում ընտրություն կատարել այս կամ այն թեկնածուի օգտին, - Գյումրիից, Վանաձորից և այլ քաղաքներից միկրոավտոբուսներով Երևանի ընտրատեղամասեր են տեղափոխվել քաղաքացիներ` ընտրություններին մասնակցելու նպատակով, - մի շարք տեղամասերում խախտվել է քվեարկության գաղտնիության սկզբունքը` խցիկների ոչ պատշաճ տեղադրված լինելու պատճառով, - ահազանգեր են ստացվել լրագրողների գործունեությունը խոչընդոտելու վերաբերյալ, ինչպես նաև արձանագրվել են լրագրողների նկատմամբ բռնության դեպքեր: ՀՀ մարդու իրավունքների պաշտպանը իր իրավասությունների շրջանակներում պատրաստ է քննարկել  ընտրախախտումների վերաբերյալ ցանկացած փաստարկված դիմում-բողոք և  կոչ է անում իրավասու պետական մարմիններին պատշաճ ստուգումներ իրականացնել ներկայացված բոլոր ընտրախախտումների վերաբերյալ: ՀՀ մարդու իրավունքների պաշտպանը դատապարտում է լրագրողների նկատմամբ իրականացված ոտնձգությունները, որոնք դարձել են օրինաչափություն յուրաքանչյուր ընտրությունների ընթացքում: Մայիսի 31-ին Մալաթիա-Սեբաստիա համայնքում տեղի ունեցած հարձակումը ՙ«168 ժամ» թերթի լրագրող Արմինե Ավետյանի և «Թրանսպերենսի ինթերնեյշնլ» ՀԿ դիտորդ Սոնա Այվազյանի նկատմամբ տեղի է ունեցել ընտրատեղամասային հանձնաժողովի նախագահի և ընտրարտեղամասում գտնվող ոստիկանության աշխատակիցների ներկայությամբ: ՀՀ մարդու իրավունքների պաշտպանը կոչ է անում համապատասխան մարմիններին իրականացնել բոլոր անհրաժեշտ միջոցառումները մեղավորներին բացահայտելու ուղղությամբ: