Արդեն հայտնի են Հայաստանում նոր միջուկային էներգաբլոկի կառուցման ծրագրի իրականացման  նպատակով կառավարման ծառայությունների ձեռք բերման համար պետական գնումների գործակալության (ՊԳԳ) հայտարարած մրցույթի հաղթողը: Դա Worley Parsons  միջազգային կոնսորցիումն է: Համաձայն ՀՀ  Էներգետիկայի և բնական պաշարների նախարար Արմեն Մավսիսյանի`«Ազատություն» ռ/կ-ին վերջերս տված հարցազրույցի` հաջորդ տարվա վերջին կամ 2011թ. սկզբին հնարավոր է սկսել Հայաստանում նոր միջուկային էներգաբլոկի շինարարության աշխատանքները: Իսկ նոր ԱԷԿ-ի կառուցմանը զուգահեռ, պարզվում է`հնարավոր է շարունակել   Մեծամորի ատոմակայանի շահագործումը ոչ թե մինչև 2016 թվականը, ինչպես նախատեսվում է, այլ` ավելի երկար, ընդհուպ մինչև 2026 թվականը: Սա ատոմային էներգետիկայի սլովակ մասնագետների կարծիքն է, և` առաջարկը` հայ էներգետիկներին: Գործող ԱԷԿ-ի  կյանքը երկարացնելու, անվտանգ շահագործելու և մոդեռնիզացնելու առաջարկով օրերս Էներգետիկայի  նախարարը Եվրոպայի հայկական միությունների ֆորումի միջնորդությամբ հյուրընկալեց Սլովակիայի PPA CONTROLL ընկերության և Սլովակ-ուկրաինական համատեղ ձեռնարկության ղեկավարությանը: Վերջիններս ներկայացնելով Սլովակիայի 1200 մեգավատ հզորությամբ ԱԷԿ-ի կառուցման, ինչպես նաև` Ուկրաինայի չորս ատոմակայանների մոդեռնիզացման իրենց բազմամյա փորձը, առաջարկեցին նույնը ներդնել նաև Հայաստանի միջուկային էներգաբլոկի երկարաժամկետ շահագործման գործում: Եվրոպայի հայկական Միությունների ֆորումի  ներկայացուցիչ Աշոտ Գրիրորյանի փոխանցմամբ`նախարարը հավանության է արժանցրել սլովակ գործընկերների առաջարկը: Պայմանավորվածություն է ձեռք բերվել երկու ամսվա ընթացքում ներկայացնել Մեծամորի ատոմակայանի անվտանգության բարձրացման ուղղությամբ առաջարկությունների փաթեթը: Հայաստանյան եռօրյա այցի ընթացքում սլովակները հասցրել էին արձանագրել, որ Մեծամորի ԱԷԿ-ը բավականին մատչելի էլեկտրաէներգիա է արտադրում, ինչը չի կարելի ակնկալել կառուցվելիք ատոմակայանից: PPA CONTROLL-ի գլխավոր տնօրեն Իվան Նովակը չթաքցրեց զարմանքն ու ասաց, որ հնարավորինս պետք է հետաձգել գործող ԱԷԿ-ի փակումը, ինչի համար իրենք պատրաստ են ներդնել  իրենց փորձն ու գիտելիքները, եթե Հայաստանի ղեկավարությունն ընդունի առաջարկությունների իրենց ծրագիրը: Նկատենք, որ նմանատիպ առաջարկությամբ Էներգետիկայի նախարարությանն է դիմել նաև ռուսական մի ընկերություն: Հայկուշ Ասլանյան