Այսօր Արաբկիրի կադաստրի պետի տեղակալ Արամ Չատինյանի հարազատ եղբորը՝ 40-ամյա Տիգրան Չատինյանին, ոստիկանության կազմակերպված հանցավորության դեմ պայքարի գլխավոր վարչության (6-րդ վարչություն) աշխատակիցները ներկայացրել են Կենտրոնի դատարան եւ դատավոր Գագիկ Ավետիսյանին միջնորդել՝ վերջինիս նկատմամբ խափանման միջոց կիրառել կալանավորումը:

Ինչպես փոխանցում է ֆոտոլրագրող Գագիկ Շամշյանը՝ Արաբկիրի կադաստրի պետի տեղակալը ներքին գործերի Սպանդարյանի, իսկ հետո Կենտրոնականի, ապա Մասիսի բաժինների պետ Սամվել Ռշտունու հետ դատարանի բակում էր: Ըստ ֆոտոլրագրողի՝ հավաքվածները խոսել են, թե «ոչ մի խնդիր չկա, վերևներով հարցերը լուծել ենք, մեր ախպերը դատարանից ազատ է արձակվելու»:

Տիգրան Չատինյանը բնակվում է Այգեձոր 63 տանը: Նրան օգոստոսի 17-ին ոստիկանները բերման են ենթարկել Թումանյան-Հյուսիսային պողոտա խաչմերուկից:

Գագիկ Շամշյանը հայտնում է, որ Տ. Չատինյանը 2005թ. դեկտեմբերի 20-ից միջպետական հետախուզման մեջ էր Ուկրաինայի Հանրապետության Օդեսայի մարզի Մարինովսկի ոստիկանության բաժնի կողմից՝ դիտավորյալ սպանություն կատարելու մեղադրանքով: Տիգրանն ընկերոջ` դարձյալ հետախուզման մեջ գտնվող Վաղարշակ Մուրադյանի հետ Օդեսայում գտնվող «Գլորիա» ակումբում հրազենային կրակոցներ է արձակել այնտեղ գտնվող Արարատի մարզի Մխչյան գյուղի բնակիչներ` եղբայրներ 40-ամյա Համիկ, 35-ամյա Ռոբերտ եւ 49-ամյա Մխիթար Գեղամյանների վրա:

Կրակոցների արդյունքում Համիկը մահացել է, իսկ Ռոբերտն ու Մխիթարը ստացել են վնասվածքներ: Ավելի ուշ պարզվել էր, որ Համիկի և Մխիթարի վրա կրակոցներն արձակել էր Տիգրանը, իսկ Ռոբերտի վրա՝ նրա ընկեր Վաղարշակը՝ «Մակարով» տեսակի ատրճանակով: Հրազենային վնասվածքներ էր ստացել նաև «Գլորիայում» գտնվող 30-ամյա մի մոլդովացի տղամարդ:

Դատավոր Գագիկ Ավետիսյանը բավարարել է քննչական մարմնի միջնորդությունը եւ Տիգրան Չատինյանի նկատմամբ որպես խափանման միջոց է կիրառել 40-օրյա կալանքը: Չատինյանը տեղափոխվել է «Նուբարաշեն» ՔԿՀ:

Լուսանկարները` Գագիկ Շամշյանի