«Մինչեւ առանձին քաղաքական ուժեր բողոքարկում են ընտրությունների արդյունքները,  Հանրապետական կուսակցությունը նշում է իր հերթական հաղթանակը»,-այսօր հայտարարությունների ժամին ասաց ՀՀԿ-ական Գագիկ Մելիքյանը:Նա նշեց, որ ժողովուրդն իր ձայնը տվեց  այն ուժերին, ում գործը տեսել է, ում հավատում եւ վստահում է. «Ընտրություններին մասնակցել են ավելի քան 4 հարյուր հազար երեւանցիներ եւ բնական է, որ ինչ-ինչ միջադեպեր կլինեն, բայց որ այս ընտրություններում կանխակալ մոտեցում որեւէ քաղաքական ուժի նկատմամբ չի եղել, համոզված եմ»: Պատգամավորը վստահ է, որ կանցնի ժամանակ եւ կրքերը կհանդարտվեն: ՀՅԴ-ական Արծվիկ Մինասյանը Գագիկ Մելիքյանին հիշեցրեց փիլիսոփաներից մեկի խոսքը, թե ցանկացած հաղթանակ եւ պարտություն հարաբերական է: «Ժառանգության» պատգամավոր Զարուհի Փոստանջյանն էլ համոզված է, որ իշխանություններն իրականացնում են ապազգային քաղաքականություն, որի ապացույցը 2008 թ. ընտրություններն են. «Մեկ սպանության դեպքի արդարացի ուսումնասիրության արդյունքում փակվեց Փաստահավաք խումբը` վերջնականապես համոզելով մեր հասարակությանը, որ արդարության բացահայտման հիմնական հակառակորդը մեր երկրում իշխանական համակարգն է»: Ստյոպա Սաֆարյանն էլ  Փաստահավաք խմբի լուծարումը որակեց որպես նախագահի չկամություն բացահայտել 10 զոհերի սպանության հանգամանքները.  «Պարտադրված արձակուրդի խորապատկերին, զեկույցին հաջորդած ռեակցիան` Հատուկ քննչական ծառայության նյարդային հայտարարությունները եւ նախագահականի լռությունը, հաստատելու են գալիս, որ նախագահական նստավայրը առնվազն համակարծիք է եղել, որ խումբը չպետք է աշխատի, չպետք է զեկույցներ ներկայացնի եւ այդ զեկույցները չպետք է հակասեն ՀՔԾ-ի «քննած» գործերին եւ «սարքած» ապացույցներին»: