Վ.Հովհաննիսյան. «Լեւոն Տեր-Պետրոսյանը եւ նրա իրական արբանյակները չեն կարող որեւէ մեկի հետ համագործակցել` չլինելով պապայի դերում»
«Պետդեպարտամենտի զեկույցի մեջ, ինչպես միշտ, թացը չորի հետ խառնված է, բայց կան կետեր, որ առանձնապես վեճի առարկա չեն, մենք էլ գիտենք, որ նախագահական ընտրությունները ոչ ամենալավ ձեւով անցան, սակայն վիճելի է այն դրույթը, թե ճգնաժամը մինչ օրս հաղթահարված չէ»,-այսօր խորհրդարանական ճեպազրույցների ժամանակ ասաց ՀՅԴ խմբակցության ղեկավար Վահան Հովհաննիսյանը:
Վահան Հովհաննիսյանի համար անհասկանալի է, թե ինչու պետք է զեկույցի պատճառով տուժեն փոքր համայնքները:
«Գուցե ստեղծված իրավիճակում ՀՅԴ-ն պետք է պահանջի իշխանությունների հրաժարականը» հարցին Հովհաննիսյանը պատասխանեց, որ իշխանությունների հետ կոշտ խոսելն ինքնանպատակ չէ. «Մենք ունենք կոպիտ խոսելու օրինակ` մարտի 1-ին եւ դրա նախորդ օրերին: Ես չեմ գտնում, որ իշխանությունները բացարձակապես անուղղելի են, եթե նման բան նկատեցինք, համապատասխան քայլերի կդիմենք»:
Րաֆֆի Հովհաննիսյանի կոչը` ձեւավորել համագործակցության դաշտ «Ժառանգության» հետ, խմբակցության ղեկավարը ճիշտ է համարում, սակայն նշեց, որ համագործակցությունը Հայաստանում քաղաքական ուժերի միջեւ «պրոբլեմատիկ է, քանի որ մեծ դեր են խաղում ամբիցիաները»: Բայց Վ. Հովհաննիսյանը ամբիցիաներ չունի եւ պատրաստ է անել առաջին քայլը:
Իսկ «Ժառանգությանը» ընդդիմադիր մամուլի կողմից արբանյակ որակելը, ըստ Հովհաննիսյանի, ամբիցիոզ է եւ անխոհեմ. «Լեւոն Տեր-Պետրոսյանը եւ նրա իրական արբանյակները չեն կարող որեւէ մեկի հետ համագործակցել` չլինելով պապայի դերում, իսկ նրան պապայի դերում ՀՀ ոչ մի նորմալ քաղաքացի չի կարող տեսնել: Մենք էլ այս պայմաններում նրա հետ համագործակցության որեւէ դաշտ չունենք»:
Իշխանությունների հետ համագործակցությունը, ինչպես նշեց Հովհաննիսյանը, շարունակվելու է, մասնավորապես այն հարցերի շուրջ, որոնք համահայկական նշանակություն ունեն:
Համաներումն էլ ՀՅԴ-ն անհրաժեշտ է համարում. «Մարտի 1-ի հանձնաժողովին եթե չենք վստահում, ուրեմն մնում է համաներում անել»:
Լրագրողները հարցրին, թե ինչ կարող է նշանակել այն, որ Հայաստան ժամանած ԱՄՆ պետքարտուղարի տեղակալ Ֆիլիպ Գորդոնը ընդդիմադիրներից հանդիպել է միայն «Ժառանգության» առաջնորդ Րաֆֆի Հովհաննիսյանի հետ, ՀՅԴ խմբակցության ղեկավարը պատասխանեց. «Դա նշանակում է, որ ինչ-որ կուսակցություններ ապահովում են արտահոսքը, իսկ որոշները` ոչ»:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել