Ավարտվել է Պատրիկ Արապյանի բողոքի քննարկումը
Հունիսի 15-ին Թբիլիսիի քաղաքացիական վարչական դատարանում կայացել է ֆրանսահայ փաստաբան Պատրիկ Արապյանի դիմումի մերժման վերաքննիչ բողոքի քննարկումը: Պատասխանող կողմը` դատախազությունը, «Միասնական Ջավախք» դեմոկրատական դաշինքի առաջնորդ Վահագն Չախալյանի շահերը պաշտպանելու կապակցությամբ Պատրիկ Արապյանի դիմումի մերժումը Արդարադատության նախարարության կողմից պատճառաբանել է նրանով, որ նոր փաստաբանի ներգրավումն անհարկի ձգձգելու էր Չախալյանների գործի քննությունը:
Պատրիկ Արապյանի շահերը դատարանում ներկայացնող Նինո Անդրիաշվիլին նշել է, որ Չախալյանների դատավարությունները մշտապես անհարկի ձգձգվում էր, և դա չէր կարող մերժման հիմք դառնալ: Փաստաբանը հավելել է, որ եթե հիմա էլ հաստատեն Պատրիկ Արապյանին` որպես Չախալյանների շահերի պաշտպան, նա կարող է մասնակցել Վերաքննիչ դատարանում սկսվելիք` Վահագն Չախալյանի նկատմամբ կայացրած առաջին ատյանի դատավճռի բողոքարկման պրոցեսին:
«Երկիր» միության ծրագրերի համակարգող Ռոբերտ Թաթոյանը տեղեկացրեց, որ դատարանը վերցրել է Առաջին ատյանի դատավճիռը, որպեսզի ուսումնասիրի և հետաձգել դատական նիստը մինչև հունիսի 30-ը: Նույն օրը դատավորը նաև հրապարակելու է որոշումը:
Հիշեցնենք, որ Վրաստանի արդարադատության նախարարությունն այս տարվա փետրվարի 16-ին, առանց որեւէ պատճառաբանման, հրաժարվել էր գրանցել Փարիզի փաստաբանական կոլեգիայի անդամ Պ. Արապյանին` որպես Չախալյանների պաշտպան:
Վահագն Չախալյանի նկատմամբ առաջին ատյանի դատավճռի բողոքարկումը Վերաքննիչ դատարանն արդեն վարույթ է ընդունել, սակայն նիստը դեռ չի նշանակվել:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել