Ազգային ժողովի արտահերթ նիստում 98 կողմ, 1 դեմ և 3 ձեռնպահ ձայներով ընդունվեց նախագահի համաներման առաջարկը: Զարուհի Փոստանջյանը տեղեկացրեց, որ ինքն է դեմ քվեարկել, քանի որ սխալ է համարում այն, որ համաներումը տարածվում է մարտի 1-2-ին տեղի ունեցած իրադարձությունների ոչ բոլոր մասնակիցների վրա:

Արդարադատության նախարար Գեւորգ Դանիելյանը, նախքան քվեարկությունը, կես ժամ ընդմիջում խնդրեց պատգամավորների առաջարկությունները քննարկելու եւ նախագիծը վերջնական տեսքի բերելու համար: Այնուհետեւ ներկայացրեց լրամշակված տեքստը, որի հիմնական փոփոխությունը  Հովիկ Աբրահամյանի ներկայացրած առաջարկն էր`  փոփոխություն կատարել 7-րդ կետում` պատժաչափը կիսելու վերաբերյալ դրույթը տարածելով մարտի 1-2-ի առնչությամբ հանցագործություն կատարած անձանց նկատմամբ, ինչը ընդունվեց: Նախարարը նաև տեղեկացրեց, որ կկարճվեն մարտի 1-2-ի առնչությամբ քրեական գործերը և նոր գործեր չեն հարուցվի: