Ուսուցիչներին առայժմ թույլ չեն տվել գալ Հայաստան
Վիրահայոց թեմի առաջնորդարանից «Հետքին» տեղեկացրին, որ Հայաստան վերապատրաստման ուղարկվող ուսուցիչների համար թույլտվություն դեռեւս չեն ստացել: Մինչդեռ նախատեսվում էր երկուշաբթի հարցը կարգավորել: Վիրահայոց թեմի առաջնորդ Վազգեն եպիսկոպոս Միրզախանյանը տեղեկացրեց, որ սպասում են Վրաստանի կրթության նախարարությունից գրավոր թույլտվության, որպեսզի ուսուցիչներին ուղարկեն Երևան: Այն պատրաստ լինելու դեպքում Վրաստանի ԱԳ-ն տեղեկացնելու է Վրաստանում Հայաստանի դեսպանատանը:
«Բոլոր տեղերից դրական արձագանքներ կան, տեսնենք, բայց առայժմ ոչ մի պատասխան չկա: Եթե մինչև հաջորդ երկուշաբթի ստանանք գրավոր արտոնագիրը, երկուշաբթի օրը հնարավոր է արդեն ուսուցիչներին ուղարկենք Երևան»,-ասաց Սրբազանը:
Հիշեցնենք, որ հունիսի 15-ին նախատեսվում էր Վրաստանից թվով 90 ուսուցիչների վերապատրաստման դասընթացներ սկսել Հայաստանում: Սակայն հունիսի 12-ին Վրաստանի ազգային անվտանգության ներկայացուցիչներն ուսուցիչներին թույլ չէին տվել մեկնել:
Քրիստոնեական դաստիարակության կենտրոնի տնօրեն Հայր Վարդանը, ով նույնպես ընդգրկված էր ծրագրում, տեղեկացրեց, որ Վիրահայոց թեմի առաջնորդ Վազգեն եպիսկոպոս Միրզախանյանը դիմել է կառավարությանը Հայ եկեղեցու պատմություն առարկայի շրջանակներում հայ ուսուցիչների վերապատրաստում կազմակերպելու խնդրանքով, որտեղից ՀՀ ԿԳՆ-ին և Սփյուռքի նախարարությանը հանձնարարվել է կազմակերպել վերապատրաստման դասընթացները:
Ծրագիրը 64 դասաժամից է բաղկացած: Անցկացնում է Մայր Աթոռը և Կրթության ազգային ինստիտուտը: «Երկամսյա դասընթացը պետք է մատուցվեր խտացված` երկու շաբաթվա ընթացքում»,-ասաց Հայր Վարդանը:
ՀՀ ԿԳՆ Սփյուռքի հետ կապերի բաժնի պետ Նունե Վարդանյանի հավաստմամբ, պայմանավորվածություն կար, սակայն հունիսի 12-ին ԿԳՆ տեղեկացվել է, որ խումբը չի կարող գալ, քանի որ Վրաստանի Կրթության նախարարությունը պետք է թույլտվություն տա:
«Քանի որ ուսումնական տարին իրենց մոտ չի ավարտվել, ուսուցիչների բացակայությունը նախարարությունը թույլ չի տվել: Առայժմ այդ հարցը քննարկվում է: Տեղյակ է նաև ՀՀ ԿԳ նախարար Արմեն Աշոտյանը: Նա փորձել է կապվել Վրաստանի Կրթության նախարարի հետ, սակայն առայժմ հարցը կարգավորված չէ, ուսուցիչները չեն եկել, բայց կարծում ենք, ուսուցիչները կգան»,-վստահեցրեց Նունե Վարդանյանը:
«Հետքի» հարցին, թե ինչ պատճառներով կարող էր այս կրթական հարցին միջամտել Վրաստանի Ազգային անվտանգության ծառայությունը, Նունե Վարդանյանը պատասխանեց. «Վրաստանից մեզ էլ ասացին, որ նման խնդիր եղել է, բայց չեմ կարող ասել, թե ինչն է պատճառը: Մեզ պարզաբանեցին, որ ռեսուրս կենտրոնների թույլտվությունն ու համաձայնությունն իրենք ունեցել են, բայց վերջին պահին, երբ երկուշաբթի մարդիկ պետք է գային, նրանց ասվել է, որ առանց նախարարության թույլտվության իրենք չեն կարող մեկնել Հայաստան»:
Սփյուռքի նախարարության ԱՊՀ երկրների հետ կապերի վարչության պետ Գևորգ Ներսիսյանը տեղյակ չէր, որ ջավախահայ ուսուցիչներին ազգային անվտանգության աշխատակիցները կանչել ու հարցաքննել են. «Մենք հաղորդելու բան չունենք: Երբ որ հայտնի կլինի նրանց գալու օրը, մենք կհայտնենք»,-ասաց նախարարության ներկայացուցիչը:
Հարցին, թե ինչու է նման խնդիր առաջացել, Գ. Ներսիսյանը պատասխանեց. «Ինչ իմանամ, ես այստեղ, նրանք` այնտեղ»:
Մեր երկրորդ անգամ հնչեցրած ճշգրտող հարցին, թե արդյոք Սփյուռքի նախարարությունը տեղյակ չէր, որ ուսուցիչներին տարել են Ազգային անվտանգության ծառայություն, Գևորգ Ներսիսյանը պատասխանեց. «Չէ: Ամեն ինչ նորմալ է, գալու են»: Սակայն թե երբ են գալու, Գ. Ներսիսյանը չգիտեր. «Անորոշ վիճակ է, ինչ ասեմ, ես վստահ եմ, որ գալու են»,-ամփոփեց Գևորգ Ներսիսյանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել