Հունիսի 23-ին Վայոց ձորի մարզից տեղեկություն է ստացվել, որ ժամը 18.00-ից 19.00-ի սահմաններում տեղացած  անձրեւի  հետեւանքով առաջացած սելավը վնասել է Մալիշկայի գյուղամիջյան ճանապարհն ու եզրաքարերը (մոտ  40 մ երկարությամբ), ինչպես նաեւ ջրալցվել են մի քանի տան նկուղներ: Դեպքի վայր է մեկնել մարզային փրկարարական վարչության փրկարար ջոկատը: «Ձեռնարկված միջոցառումների արդյունքում ճանապարհը դարձել է երթեւեկելի: Կատարվել են նաեւ ջրահեռացման աշխատանքներ»,-հայտնում է Հայաստանի փրկարար ծառայության տեղեկատվության եւ հասարակայնության հետ կապերի բաժինը: Նույն օրը, ժամը 20.01-ին ահազանգ է ստացվել, որ ժամը 18.00-ի սահմաններում տեղացած անձրեւի հետեւանքով ջրալցվել են Երեւանի Այգեգործների փողոցի մի քանի բնակելի տներ: Դեպքի վայր են մեկնել քաղաքապետարանի կոմունալ վարչության եւ Երեւանի փրկարարական վարչության Էրեբունի համայնքային բաժնի ներկայացուցիչներ: Տեղում իրավիճակն ուսումնասիրելուց հետո որոշվել է հունիսի 24-ին իրականացնել դիտահորերի մաքրման աշխատանքներ: