50 տարեկանում մահացել է 20-րդ դարի աշխարհահռչակ ամերիկացի երգիչ Մայքլ Ջեքսոնը: Նախնական վարկածով, մահը վրա է հասել սրտի կաթվածի պատճառով, սակայն վերջնական եզրակացությունը կկազմվի այսօրվա դիահերձումից հետո: Շտապօգնությունը Ջեքսոնի բնակարան է հասել տեղական ժամանակով 12:21-ին, երբ երգչի շնչառությունը կանգ էր առել:  Երբ նրան հասցրել են Կալիֆորնիայի UCLA բժշկական կենտրոն, Ջեքսոնն արդեն մահացել էր: Մայքլ Ջեքսոնի մահվան մասին պաշտոնապես հայտարարվել է երկու ժամ անց: Չնայած առողջականի հետ կապված խնդիրներին` Մ. Ջեքսոնն այս տարի պատրաստվում էր համերգներ տալ աշխարհի տարբեր երկրներում: Առաջին համերգը նախատեսված էր հուլիսի 13-ին Լոնդոնում: Տոմսերն արդեն վաճառված էին: Ջեքսոնը ծնվել էր 1958 թ. օգոստոսի 29-ին ԱՄՆ Ինդիանա նահանգում: Ողջ աշխարհում նա հայտնի է որպես «փոփ երաժշտության արքա»:  Նրա հայտնի հիթերից են` «I Want You Back», «Don't Stop Til You Get Enough», «Billie Jean», «Bad, Black or White», «Earth Song» և այլն: