Հունիսի 20-ից Շուշիի մշակութային ճամբարում իրենց հանգիստն են անցկացնում թվով 45 երիտասարդներ` Հայաստանից, Վրաստանից, Լեհաստանից եւ Արցախից: Մեկշաբաթյա ամառային հանգիստը, որն արդեն ավանդույթ է դառնում, անցկացվում է «Երիտասարդ մարդկանց քրիստոնեական ընկերակցություն» միջազգային կազմակերպության նախաձեռնությամբ: Կազմակերպության ղարաբաղյան մասնաճյուղի ղեկավար Դավիթ Մելքումյանը Հետքին տեղեկացրեց, որ վաղը ճամբարականներն արդեն կմեկնեն Ղարաբաղից: Այսօր նրանց ընդունել է ԼՂՀ Ազգային ժողովի նախագահ Աշոտ Ղուլյանը: Ինչպես հայտնում են ԱԺ մամուլի ծառայությունից, ողջունելով իր տարազգի հյուրերին, ԱԺ նախագահը գոհունակություն հայտնեց հանդիպման կապակցությամբ, նշելով, որ այն, փաստորեն, իրականացումն է այն պայմանավորվածության, որ ձեռք է բերվել նրանց Արցախ ժամանելու առաջին օրերին` Շուշիի ճամբարում իրենց հանպատրաստից հանդիպման ժամանակ: «Չնայած Լեռնային Ղարաբաղի Հանրապետությունն առայժմ չճանաչված երկիր է, բայց դա չի կարող խոչընդոտ հանդիսանալ, որպեսզի մենք ինքնուրույն կառուցենք մեր անկախ պետականությունը` առաջնորդվելով այն համընդունելի սկզբունքներով ու հիմնարար նորմերով, որոնք գործում են աշխարհի եւ, առաջին հերթին, Եվրոպայի ցանկացած ժողովրդավարական երկրում»,- հանդիպման ժամանակ ասել է Ա.Ղուլյանը: Խորհրդարանի նախագահն այնուհետեւ երիտասարդներին հանգամանալի ներկայացրեց ԼՂՀ-ում պետականաշինության գործընթացը, այդ համատեքստում` երկրի օրենսդիր մարմնի կառուցվածքն ու գործունեությունը, նշեց երկրի առաջընթացի ձեռքբերումները, անելիքներն ու հեռանկարները: