Երեկ երեկոյան տեղեկություն ստանալով, որ Քաջարանի տարածաշրջանի «Գյոլ-գյոլ» լճի մերձակայքում անհայտ անձանց կողմից կատարվում է որս, բնապահպանության նախարարության բնապահպանական տեսչության Սյունիքի տարածքային բաժանմունքի աշխատակիցները ոստիկանության Կապանի բաժնի ներկայացուցիչների հետ կազմակերպել են շուրջկալ: Արդյունքում ՎԱԶ 2107 մակնիշի ավտոմեքենայի մեջ հայտնաբերվել է 4 միավոր հրազեն («Կարաբին» տեսակի ակոսավոր ինքնաշեն և ողորկափող երկուական որսորդական հրացաններ), ինչպես նաև 2 բեզոարյան այծի մաշկազերծված մարմին: «Ոստիկանության կողմից սկսված է հետաքննություն և համապատասխան քայլեր են ձեռնարկվում որսագողության մասնակից` փախուստի դիմած այլ անձանց հայտնաբերելու համար»,- տեղեկացնում է Բնապահպանության նախարարության մամլո ծառայությունը: Ի դեպ, վերջերս Գերմանիայի Դաշնության «Բնության պահպանության միության»  հետ համագործակցության շրջանակներում բնապահպանության նախարարության բնապահպանական պետական տեսչության Սյունիքի տարածքային բաժնին կից ստեղծվել է որսագողության դեմ պայքարի խումբ: