Այսօր «Չորրորդ իշխանություն» օրաթերթի լրագրող Գոհար Վեզիրյանը համաձայնել է համաներման միջոցով ազատվել քրեական հետապնդումից: «Ես ինձ մեղավոր չեմ ճանաչել, բայց գրել եմ, որ համաձայն եմ ազատվել հետապնդումից համաներման միջոցով»,- մեզ հետ զրույցում ասաց լրագրողը: Հիշեցնենք, որ Գոհար Վեզիրյանը մեղադրվում էր Քրեական օրենսգրքի 343-րդ հոդվածի 3-րդ մասով` «դատարանի նկատմամբ անհարգալից վերաբերմունք» ցուցաբերելու մեջ: Ընդհանուր իրավասության դատարանի վճռով` լրագրողը պետք է վճարեր 350 հազար դրամ տուգանք, սակայն համաներման միջոցով ազատվեց պատժի կրումից: Նույնչափ տուգանք էր նշանակվել նաեւ «Չորրորդ իշխանություն» եւ «Առավոտ» օրաթերթերի ֆոտոլրագրող Գագիկ Շամշյանի նկատմամբ, որը եւս մեղադրվում է «դատարանի նկատմամբ անհարգալից վերաբերմունք» ցուցաբերելու մեջ: Շամշյանը մեզ հետ զրույցում հայտարարեց, որ ինքը «համաներվելու» ցանկություն չունի: «Ես որեւէ հանցագործություն չեմ արել, որ ինձ համաներեն, թող իրենց դատավորներին համաներեն»: Ֆոտոլրագրողը պատրաստվում է դիմել Վճռաբեկ դատարան, իսկ մերժվելու դեպքում` միջազգային ատյաններ: Նշենք, որ դատարանը Գոհար Վեզիրյանի եւ Գագիկ Շամշյանի մեղավորությունը հիմնավորված էր համարել բացառապես դատական կարգադրիչների տված ցուցմունքներով: