Հողի հարկի հինգ ամսվա ցուցանիշը 50 տոկոսից ցածր հավաքագրելու համար հունիսի 30-ին  ՀՀ տարածքային կառավարման նախարարին  կից կոլեգիայի նիստում ՀՀ փոխվարչապետ, տարածքային կառավարման նախարար Արմեն Գևորգյանն անբավարար է գնահատել Արարատի և Արմավիրի մարզպետների աշխատանքը: Արարատի մարզպետ Վարդգես Հովակիմյանն անակնկալի եկավ լուրից. նրա համոզմամբ` իր աշխատանքը դրական գնահատականի է արժանի: «Ո՞վ Է տեսել, որ կիսամյակը դեռ չամփոփած` գնահատական ստանանք: Ես այս հարցը դեռ բարձրացնելու եմ»,- ասաց մարզպետը, կարևոր համարելով հիշեցնել, որ նախորդ տարի իրենք 106,7 տոկոս հավաքագրման ցուցանիշ են ներկայացրել: Նրա փոխանցմամբ` վերջին հինգ ամիսների արդյունքները թույլ են տալիս վստահեցնելու, որ կիսամյակը փակելու են 50 տոկոսից ավել արդյունքով: Ստացվում, որ չաշխատող համայնքապետերի համար պատասխան են տալիս մարզպետները: Արմավիրի մարզպետ Աշոտ Ղահրամանյանն օրինակ, նկատեց, որ Տեղական ինքնակառավարման մասին օրենքը  թեև մարզպետներին արտոնում է անվստահություն հայտնել համայնքների իրենց պարտականությունները չկատարող  ղեկավարների նկատմամբ, բայց  «Դա այնքան երկար ու ձանձրալի գործընթաց է, որ մինչև գործը հասնում է դատարան, համայքապետի պաշտոնավարման ժամկետը լրանում է»: Տարածքային կառավարման նախարար Արմեն Գևորգյանը չհերքեց գործող օրենսդրությամբ համայնքապետերի նկատմամբ անվստահություն հայտնելու  բարդ մեխանիզմը:  «Դա մտածված է արվել, որ որևէ  պետական պաշտոնյայի մոտ ցանկություն չառաջանա օրումեջ անվստահություն հայտնել համայքի ղեկավարին: Դա արված է նաև նրա համար, որ պահպանվի տեղական ինքնակառավարման մարմինների անկախությունը»,-ասաց Արմեն Գևորգյանը: Իսկ հարցին, թե` անվստահություն հայտնելու գրեթե անիրագործելի մեխամիզմն անձեռնամխելի չի՞ դարձնում արդյոք համայնքապետին, նախարարն ասաց. «Ինչ որ տեղ` այո, այդպես է, բայց հիմա այդ ուղղությամբ քննարկումներ են ընթանում` ՏԻՄ օրենքում համապատասխան փոփոխություններ մտցնելու համար»: Որ տարածքային կառավարման նախարարությունը մարզպետների աշխատանքը ստուգելու և գնահատելու քաղաքականություն է որդեգրել, Արմավիրի մարզպետը ճիշտ և անհրաժեշտ է համարում, բայց, որ նման լիազորություններ վերապահված չեն իրենց` դա արդեն վերագրում է ՏՒՄ օրենքի բացին: Բացի հողի հարկի հավաքագրման ցածր ցուցանիշից, տարածքային կառավարման նախարարը դժգոհ է մնացել նաև Արմավիրի մարզում 2009 թվականին կուտակած աշխատավարձերի պարտքերի մարման գործընթացից: Նախարարը հանձնարարել է խորությամբ ուսումնասիրել պատճառները, իրավիճակը շտկելու ուղղությամբ քայլեր ձեռնարկել և արդյունքների մասին մեկ ամսվա ընթացքում զեկուցել իրեն: Թեև հողի հավաքագրման 50 տոկոսից ցածր ցուցանիշ էլ Շիրակի մարզում է արձանագրվել, բայց  տարածքային կառավարման նախարարին կից կոլեգիայի նիստում ձեռնպահ են մնացել Լիդա Նանյան անբավարար գնահատելուց: Հայկուշ Ասլանյան