Արագածոտնի մարզի բոլոր համայնքապետերը հուլիսի առաջին տասնօրյակին, ըստ հերթականության,   ներկայացնում են իրենց եռամսյա հաշվետվությունները: Հունիսի 2-ը Ապարանի քաղաքապետ Գոռ Աբրահամյանի հաշվետվության օրն էր: Քաղաքապետն իր հաշվետվությունը ներկայացրել է ավագանու ընդլայնված նիստում: Նշենք, որ համայնքի բյուջեի  2009 թ. առաջին կիսամյակի վերլուծությամբ   նախատեսված 59 մլն. 845, 5 հազարի դիմաց այն կատարվել է 53 մլն. 259,8 հազար դրամ (89 %) : Սեփական եկամուտների վարչական մասով բյուջեն կատարվել է 88,1%, իսկ ֆոնդային մասով` 38,3%: Ըստ համայնքապետի, Ապարանում գործում են համայնքային ենթակայության 2 մանկապարտեզ, մշակույթի տուն, արվեստի դպրոց, մարզադպրոց, մանկապատանեկան ստեղծագործության կենտրոն, գրադարան: Քաղաքապետարանի 32 հաստիքից 16-ը համայնքային ծառայող է: Նրանք բոլորն էլ ատեստավորվել են եւ ստացել դասային աստիճաններ: Քաղաքապետի կողմից նշվեց, որ ինչպես Ապարանի տարածաշրջանում գյուղատնտեսությունը գտնվում է բնակլիմայական անբարենպաստ պայմաններում: Ամեն տարի, հատկապես գարնանը տեղացող կարկուտը, փոթորիկներն ու հեղեղները մեծ վնաս են հասցնում գյուղատնտեսությամբ զբաղվողներին: Ըստ Գոռ Աբրահամյանի, հավանաբար դա է պատճառը, որ շատերն են իրեն դիմում հողատարածքները թողնելու խնդրանքով: 2008-2009 թթ. ընթացքում Ապարան քաղաքում տնամերձ հողամաս է գնել ընդամենը 3 քաղաքացի, գյուղատնտեսական նշանակության հողեր գնելու ցանկություն չի ունեցել եւ ոչ մի քաղաքացի: Մարդիկ քիչ թե շատ հետաքրքրված են միայն հասարակական կառուցապատման նպատակով նախատեսված հողատարածքների հանդեպ: Ինչպես հանրապետության բոլոր քաղաքներում, այնպես էլ Ապարանում մարդիկ ջանում են հողակտորներ ձեռք բերել միջպետական նշանակության ավտոմայրուղու հարակից մասերում: Այս հանգամանքն էլ հաշվի առնելով, պարոն Աբրահամյանը հայտարարեց, որ անհամամասնություն է ստեղծվում  հասարակական կառույցների տարածականության ապահովման եւ քաղաքի կենտրոնը բեռնաթափելու գործում: Ինչ վերաբերում է քաղաքաշինությանը, քաղաքապետն ասաց, որ  չնայած ճգնաժամային իրավիճակին, քաղաքում շինարարական մի շարք ծրագրեր են իրականացվում: Ըստ նրա, վերանորոգվում է թիվ 2 դպրոցը, մշակույթի տունը, փոխվում կամ վերանորոգվում են խմելու ջրի ջրագծերը, բժշկական կենտրոնը եւ այլն: Սակայն, այս ամենով հանդերձ, խիստ վերանորոգման  առաջնային են մնում մանկապարտեզի համար նոր շենքի վերակառուցման, թիվ 1 դպրոցի վերանորոգման, մարզադպրոցի, ոռոգման ներտնտեսային ցանցի կառուցման, նորաստեղծ թաղամասերի գազիֆիկացման եւ այլ խնդիրներ: Քաղաքապետի կողմից թվարկված խնդիրների լուծման հարցում իր աջակցությունը հայտնեց Արագածոտնի մարզպետ Սարգիս Սահակյանը: