Տեսանյութեր
Լուսանկարներ
Գրիգոր Ոսկերչյան. «Էսօր տուն եմ գալու»
Գրիգոր Ոսկերչյանի կինն այսօր դատարանում ամուսնուն հարցրեց, թե երբ է նա տուն գալու: «Էսօր»,- պատասխանեց բանտարկյալը, այնուհետեւ ավելացրեց, թե իրեն համեղ ուտելիքներ են բերել բանտախուց. «Էդ կուտեմ, նոր տուն կգամ»:
Թեեւ Ազգային ժողովի ընդունած համաներումը տարածվում է նաեւ Ոսկերչյանի վրա, նա այսօր դատարանից ազատ չարձակվեց, քանի որ դատարանը դեռ չի հրապարակել վճիռը:
Այսօր Ոսկերչյանի պաշտպաններ Մուշեղ Շուշանյանն ու Ստեփան Ոսկանյանը շուրջ 5 ժամ ընթերցեցին 70 էջանոց պաշտպանական ճառը: Այդ ընթացքում դատավոր Գագիկ Պողոսյանը քիչ էր մնում քներ, սակայն լսելով ներկաների շշուկները եւ ֆոտոխցիկները պատրաստող լրագրողների ձայները, անմիջապես սթափվում էր եւ խիստ հայացքով նայում ներկաներին:
Պաշտպանները հանգամանալից վերլուծեցին դատավարության ողջ ընթացքում դատարանի թույլ տված սխալները, վկաների հակասական, վստահություն չներշնչող ցուցմունքները:
Մասնավորապես` պաշտպանները հայտարարեցին, որ դատարանը խախտել է արդար դատաքննության իրավունքը` Ոսկերչյանին հնարավորություն չտալով հարցեր ուղղել վկաներին:
Ըստ պաշտպանների` վկաներից մի քանիսից քննիչները խոշտանգելով են ցուցմունք կորզել, իսկ մի կին վկա էլ ոստիկանության հետ համագործակցել է, որպեսզի վերջիններս ներեն իր սիրեցյալի կատարած գողությունը:
Պաշտպանները դատարանից արդարացման դատավճիռ պահանջեցին:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել