«Սասուն» ջոկատի ազատամարտիկ Արշավիր Բոզինյանը վերջերս իշխանություններին սթափվելու կոչ էր արել եւ խոստացել, որ եթե Սասուն Միքայելյանին շուտափույթ ազատ չարձակեն, իրենք կփակեն Հրազդան տանող ավտոմայրուղին: «Ոչ ոք Ծաղկաձոր չի մտնի, ավտոները ջարդելու ենք: Թող մեր կողմերը չերեւան»- Բոզինյանը խոստացել էր խանգարել իշխանավորների ծաղկաձորյան հանգիստը: Հիշեցնենք, որ Ազգային ժողովի կողմից ընդունված համաներումը չտարածվեց «7-ի գործով» անցնող ազատամարտիկ Սասուն Միքայելյանի վրա, քանի որ վերջինս դատապարտվեց 8 տարվա ազատազրկման: Հուլիսի 2-ին կայացած հանրահավաքի ժամանակ Արշավիր Բոզինյանը «Հետքին» ասաց, թե ավտոճանապարհը փակելու հստակ օրը կորոշեն հանրահավաքից հետո: Իսկ այսօր նա ասաց, որ որոշել է սպասել մինչեւ Կոնգրեսը փորձի այլ եղանակով հասնել Սասուն Միքայելյանի ազատ արձակմանը: «Հանրահավաքին ինձ անձամբ խնդրեցին դեռեւս քայլեր չձեռնարկել մինչեւ Կոնգրեսը բանակցի իշխանության հետ, որ Սասունին բաց թողեն: Ես հարգում եմ մեր առաջին նախագահին եւ կսպասեմ,- «Հետքին» տված հարցազրույցում ասաց Արշավիր Բոզինյանը: - Բայց ես ասել եմ` վանատուրցիները սպասելու շատ ժամանակ չունեն, դուք արագ բանակցեք, եթե չէ, մենք մեր ձեւով էս հարցը կլուծենք»: