Այս մասին այսօր Ստեփանակերտի «Արմենիա» հյուրանոցում անցկացված` «Ղարաբաղյան հակամարտություն. նոր իրողություններ»թեմայով կոնֆերանսի ժամանակ հայտարարել է Ռազմավարական եւ ազգային հետազոտությունների հայկական կենտրոնի տնօրեն, ամերիկահայ վերլուծաբան Ռիչարդ Կիրակոսյանը: Նա միաժամանակ նկատել է, որ բավականին համարձակ կլինի ենթադրել, որ Հայաստանի շահերն ամեն ինչում համապատասխանում են Ղարաբաղի շահերին: Նրա խոսքերով, Ղարաբաղը պետք է ճանաչվի հակամարտության լիիրավ կողմ, քանի որ այն ունի ժողովրդավարական սկզբունքներով ընտրված իշխանություն, որը պետք է հավասար ներկայություն ունենա բանակցություններում: Շարունակելով թեման Ռիչարդ Կիրակոսյանն ընդգծել է, որ վերջին շրջանում Ղարաբաղի նշանակությունը տարածաշրջանում ավելի է մեծացել: Հենց Ղարաբաղի ռազմավարությունից է կախված տարածաշրջանի կայունությունը, նրանից է կախված, թե 10-12 տարի հետո ինչպիսինն է լինելու տարածաշրջանը: Այն որոշումը, որը պետք է հիմա կայացվի` հետագա սերունդների համար կլինի, այս միտքն է արտահայտել ամերիկահայ վելուծաբանը` ավելացնելով, որ այսօրվա իշխանությունները պետք է լուրջ մտածեն, թե ինչ Ղարաբաղ եւ Հայաստան են ժառանգություն թողնելու սերունդներին: Խոսելով ղարաբաղյան հիմնախնդրի շուրջ զարգացումների եւ Ադրբեջանի, ըստ նրա, ոչ ռացիոնալ քայլերի մասին, Ռ.Կիրակոսյանը հայտնել է այն կարծիքը, որ Հայաստանի եւ Ղարաբաղի առավելությունը կայանում է նրանում, որ այստեղ պաշտպանվելու կամքն ուժեղ է, այն դեպքում, երբ ադրբեջանցիներն էլ պատրաստ չեն հարձակման: «Ռազմահայրենասիրական ոգին շատ ավելի կարեւոր է, քան քանակը»-շեշտել է նա` հավելելով, որ Ղարաբաղի ուժեղ եւ կայուն բանակն է հենց պատերազմի կանխարգելման հիմնական գործիքը եւ տարածաշրջանի կայունության երաշխիքը: Նա միաժամանակ շեշտել է, որ Ղարաբաղի համար շատ կարեւոր է, թե նա Ռուսաստանի եւ ԱՄՆ-ի միջեւ համագործակցությա±ն ասպարեզ կդառնա, թե մրցակցությա±ն: «Իմ կարծիքով, եւ ԱՄՆ-ին, եւ Ռուսաստանին ձեռնտու է ստատուս քվոյի պահպանումը, եւ ամենեւին էլ անկեղծ չեն հայտարարությունները` հակամարտության շուտափույթ կարգավորման մասին»,-հավելել է նա: Ըստ վերլուծաբանի, Ղարաբաղի եւ Ադրբեջանի միջեւ սկզբունքային տարբերություններից մեկն էլ այն է, որ Ղարաբաղը` Հայաստանի հետ միասին, չեն պատրաստվում տարածքներ զավթել, այլ պաշտպանական դիրք են գրավել, իսկ Ադրբեջանն իր ներկայիս պահվածքով մնում է պոտենցիալ ագրեսոր: Ղարաբաղյան հիմնախնդրի ռազմական լուծում, ըստ քաղաքագետի, գոյություն չունի: Դա ցույց է տվել Վրաստանի օգոստոսյան պատերազմը, որից ստացված դասերից մեկն էլ եղել է այն, որ ռազմական լուծումը խոսում է երկրի թուլության մասին, եւ նրան կարող է բերել ավերիչ պարտության, չնայած օրեցօր աճող ռազմական բյուջեի: Այդ ամենին դիմադրելու եւ նման զարգացումները կանխելու նպատակով, Ռիչարդ Կիրակոսյանի կարծիքով, Հայաստանում եւ Ղարաբաղում անհրաժեշտ է իրականացնել բարեփոխումներ, հատկապես ռազմական բարեփոխումներ, որոնց արդյունքում եւ ՀՀ-ն, եւ ԼՂՀ-ն պետք է ամրապնդեն իրենց ինքնաբավությունը: Տեղեկացնենք, որ կոնֆերանսը նախաձեռնել է Հայաստանի Կովկասյան ինստիտուտը` «Հենրիխ Բյոլի» գերմանական հիմնադրամի աջակցությամբ: Միջոցառմանը մասնակցում էին հիմնականում Ղարաբաղի եւ Հայաստանի փորձագետներ: