«Համաներումը պետք չէ նայել միայն մարտի մեկի տեսակետից, քանի որ համաներման արդյունքում մոտ 10 անգամ ավելի շատ մարդիկ դուրս եկան քրեակատարողական հիմնարկներից, որոնք մարտի մեկի հետ ընդհանրապես կապ չունեին»,- այսօր լրագրողների հետ հանդիպման ժամանակ ասաց Մարդու իրավունքների պաշտպան Արմեն Հարությունյանը: Նա նշեց, որ ինքը կցանկանար, որպեսզի համաներումը տարածվեր մարտի մեկի դեպքերով ձերբակալված բոլոր անձանց վրա: «Բայց  համաներումը բավարար հիմք էր, որպեսզի կոնստրուկտիվիզմ հաղորդեր մեր ներպետական քաղաքական համակարգին: Ընդհանուր առմամբ, այն ծառայեց իր նպատակին»,- ասաց նա: Անդրադառնալով հուլիսի 1-ին ձերբակալված ՀԱԿ ակտիվիստներից` Տիգրան Առաքելյանի գործին` օմբուդսմենը նշեց, որ ՄԻՊ գրասենյակի արագ արձագանքման խումբը զբաղվում է այդ հարցով: «Թող չստացվի, որ ոստիկանությունը միշտ սխալ է: Միանշանակ ոստկանության աշխատակիցը վնասվածքով վերակենդանացման բաժանմունքում պառկած է: Նրա նկատմամբ ուժ էր գործադրվել, և գործ պետք է հարուցվեր: Պետք չէ ամեն ինչ բերել, մտցնել քաղաքականության տակ»,- ասաց նա: Անդրադառնալով նաև վերջերս Դաշնակցության կազմակերպած ակցիային, որի ընթացքում ակցիայի մասնակիցները բռնության ենթարկվեցին ոստիկանության կողմից, Ա. Հարությունյանը նշեց, որ բոլորն էլ  իրավունք ունեն հավաք անել և «սյունը գրկել», եթե դա ուրիշներին չի խանգարում: «Եվ այստեղ ոստիկանությունը պետք է զգուշացներ նրանց, քանի որ ամեն դեպքում հարևան երկրի նախագահն էր այնտեղ գտնվում, ու չպետք է խաթարվեր նրա` հյուրանոց ելումուտը: Եթե այդ հարցին ակցիան չէր վնասում, ապա ոստիկանությունն իրավունք չուներ ուժ գործադրել այդ մարդկանց նկատմամբ»,- ասաց նա: Օմբուդսմենը կոչ արեց, որպեսզի տարբեր ակցիաներ կազմակերպելու դեպքում իրենց նախապես զգուշացեն, որպեսզի ՄԻՊ արագ արձագանքման խումբը մասնակցի այդ ակցիաներին: «Պաշտպանը չի կարող եղածից հետո որոշել, թե ով է ճիշտ, ով` սխալ: Դրա համար բազմիցս խնդրել եմ, որ եթե ակցիաներ են կազմակերպվում, թող մեր արագ արձագանքնման խմբի տղաներին ի սկզբանե հրավիրեն, որպեսզի նրանք այնտեղ լինեն: Այդ դեպքում կտեսնենք, թե ինչ եղավ իրականում: Այդ դեպքում մեզ համար շատ ավելի հեշտ կլինի»,- ասաց նա: