Տեսանյութեր
Լուսանկարներ
Ռ. Հակոբյան. «Հայաստանը շատ ավելին ունի կորցնելու»
Վերլուծաբան Ռուբեն Հակոբյանն այսօր «Փաստարկ» ակումբում հրավիրված մամուլի ասուլիսի ժամանակ նշեց, որ եռանախագահող պետությունների նախագահների հայտարարությունից հետո թե' Ադրբեջանում, թե' Հայաստանում լուրջ քննարկումներ են սկսվել: Ու թեև այդ հայտարարությունը նոր բան չի պարունակում իր մեջ, սակայն այդ դրանով այդ պետությունների ղեկավարներն անթաքույց հայտնում են, որ իրենք շատ վճռական են տրամադրված ղարաբաղյան հարցի լուծման գործում, և իրենց ձեռնտու չէ Ղարաբաղի ստատուս քվոյի պահպանումը: Վերլուծաբանը կարծիք հայտնեց, որ այս հայտարարությունն իր մեջ որոշակիորեն պարտադրանք է պարունակում ինչպես Ադրբեջանի, այնպես էլ Հայաստանի հանդեպ:
«Մի քանի իրողությունների առկայության պայմաններում Հայաստանը միջազգային դիվանագիտական հարթության վրա հայտնվել է ոչ բարենպաստ պայմաններում: Առաջին իրողությունն այն է, որ ամբողջ ղարաբաղյան հակամարտության ընթացքում երբեք ռուս-ադրբեջանական հարաբերություններն այսքան ջերմ ու դինամիկ չեն զարգացել, ինչքան վերջին տարվա ընթացքում: Ռուսաստանն ակնկալում է Ադրբեջանից` նրա միջոցով պահպանել իր ազդեցության գոտին, ինչի ուղղությամբ արդեն քայլեր իրակաանցվել են: Վերջերս Ռուսաստանի նախագահն այցելեց Ադրբեջան, որտեղ բավականին լուրջ տնտեսական և քաղաքական բնույթի պայմանագիր ստորագրվեց: Ադրբեջանը դրա փոխարեն Ռուսաստանից ակնկալում է ադրբեջանամետ վերաբերմունք ղարաբաղյան հարցի լուծման ուղղությամբ»,- ասաց նա` նշելով, որ Ռուսաստանի ու Ադրբեջանի համագործակցության ջերմացման համար որևէ պետության չպետք է մեղադրել, քանի որ յուրաքանչյուրն իր գործունեության մեջ առաջնորդվում է իր ազգային և պետական շահերով:
Մյուս հանգամանքը, ըստ վերլուծաբանի, այն է, որ Թուրքիան, որը ամբողջ ղարաբաղյան հակամարտության ընթացքում ձգտում էր մուտք գործել այդ հակամարտության մեջ, փորձում էր դերակատար լինել տարածաշրջանային զարգացումների մեջ, և դա չէր հաջողվում: Իսկ վերջին մեկ տարվա ընթացքում Հայաստանի շնորհիվ կարողացավ լուրջ դերակատարություն ունենալ մեր տարածաշրջանում ու ղարաբաղյան հակամարտության հարցում:
«Եթե մինչ այդ Թուրքիային Հայաստանն էր դրա համար խոչընդոտում, այս դեպքում հենց Հայաստանը նպաստեց դրան: Հայաստանյան իշխանություններն այսօր անկեղծ չեն ժողովրդի նկատմամբ, նրանք չեն փորձում բացատրել այն, ինչ այսօր կա բանակցային սեղանին: Կամ իսկապես ամբողջությամբ չեն տիրապետում բանակցային գործընթացին, կամ գուցե շատ գաղտնի բաներ կան: Իսկ Ադրբեջանում այդպես չէ. այնտեղ գրեթե ամբողջ քաղաքական սպեկտորն անդրադառնում է այս հարցին, ու բոլորն էլ կարողանում են իրենց մասնակցությունը բերել դրան»,- ասաց նա:
Առաջիկայում կայանալիք Ալիև-Սարգսյան հանդիպման ժամանակ, Ռ. Հակոբյանի կարծիքով, որևէ փաստաթուղթ չի ստորագրվի. Ինչ-որ մանրամասնությունների շուրջ միայն կարող են համաձայնության գալ:
«Սակայն կարծում եմ` սկսվել է գործընթաց, և այս քայլը կնպաստի այդ գործընթացի զարգացմանը: Գուցե կոպիտ հնչի, բայց պարտադրանքի չափից է կախված, թե համաձայնություններն ինչքան շուտ կիրականանան:
Ստեղծվել է մի իրավիճակ, որտեղ քաղաքական իրողությունների դասավորվածությունը ոչ ի նպաստ Հայաստանի է, և Հայաստանը շատ ավելին ունի կորցնելու»,- ասաց նա` հավելելով, որ վերջին 10 տարիների ընթացքում ղարաբաղյան հարցում եղել է հող`կարգավիճակի դիմաց մոտեցումը, որը Ռ. Հակոբյանի կարծիքով` այս փուլի համար պրագմատիկ մոտեցւոմ է:
Վերլուծաբանը կարծիք հայտնեց, որ այսօր մեր քաղաքական դաշտի, կուսակցությունների պահվածքն ավելի շատ սպառողի հոգեբանություն է հիշեցնում, որոնք սպասում են, որ ինչ որ առաջարկ լինի, ու դատափետեն այդ առաջարկը:
«Հեշտ է քննադատել` ոչինչ չառաջարկելով: Այսօր քաղաքական դաշտն իր պահվածքով, իր մակարդակով նպաստում է, որպեսզի ղարաբաղյան հակամարտությունը լուծվի ոչ ի օգուտ Հայաստանի: Ու սա առաջին հերթին գալիս է մեր երեք նախագահների պահվածքից: Նրանք պետք է կողք կողքի նստեն, իրենց ունեցած ինֆորմացիայով ծրագիր մշակեն, թե ինչպես դուրս գանք այս իրավիճակից»,- ասաց նա:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել