Անահիտ Դանիելյան, Լուսինե Ավանեսյան Երեկ, ինչպես ավելի վաղ տեղեկացրել էինք, ՀՀ Արտաքին գործերի նախարար Էդվարդ Նալբանդյանը հանդիպում է ունեցել ԼՂՀ նախագահ Բակո Սահակյանի հետ, որից հետո նա ճեպազրույց է ունեցել լրագրողների հետ, որի մասին նույնպես գրել ենք: Երեկ հանդիպման ավարտից մոտ 1 ժամ 40 րոպե հետո ՀՀ ԱԳՆ մամուլի եւ տեղեկատվության վարչությունը հաղորդագրություն է տարածել հանդիպման եւ արտգործնախարարի ճեպազրույցի մասին: Մեզ հետ ունեցած հեռախոսազրույցի ժամանակ էլ վարչության լրատվամիջոցների հետ կապի բաժնի վարիչ Տիգրան Բալայանը հավաստիացրել է, որ հաղորդագրության մեջ հենց ղարաբաղյան լրագրողների հետ ճեպազրույցն է: Հիշեցնենք, որ հաղորդագրության մեջ նշված էր երեք հարց` 1. Իտալիայում Մեծ ութնյակի գագաթնաժողովին նախագահներ Մեդվեդեւը, Սարկոզին եւ Օբաման հայտարարությամբ հանդես եկան ղարաբաղյան հիմնախնդրի կարգավորման վերաբերյալ: Ինչպե՞ս կմեկնաբանեք այդ հայտարարությունը:  2. Պարոն նախարար, ԵԱՀԿ պաշտոնական կայքէջում հրապարակված սկզբունքների մեջ ներառված է տեղահանված անձանց եւ փախստականների վերադարձի մասին դրույթը: Ի՞նչ է դա ենթադրում:  3. ԼՂՀ նախագահը իր վերջին հարցազրույցում նշել էր, որ Արցախին չի գոհացնում բանակցությունների ներկայիս ձեւաչափը: Տպավորություն է ստեղծվում, որ ԼՂՀ իշխանություններն այլ մոտեցումներ ունեն հիմնախնդրի կարգավորման ընթացքի վերաբերյալ: Ի՞նչ կասեք այդ  կապակցությամբ: Սակայն հարկ է նկատել, որ վերոնշյալ հարցերից եւ ոչ մեկն էլ չի հնչել ԼՂՀ-ում աշխատող լրագրողների հետ ճեպազրույցի ժամանակ, ինչն էլ հարուցել է որոշ լրագրողների դժգոհությունը: Ըստ ամենայնի, ԱԳՆ մամուլի եւ տեղեկատվության վարչությունը չի ցանկացել երեւան հանել արտգործնախարարին ղարաբաղցի լրագրողների տվածառավել սուր հարցադրումները եւ նախընտրել է նախարարի` սուր հարցադրումներին տրված ոչ այնքան հստակ ու խուսափողական պատասխանների առաջ դնել այլ հարցեր, որոնք իրականում չեն հնչել: Պարզապես ուզում ենք ներկայացնել այն բոլոր հարցերը, որոնք հնչել են ճեպազրույցի ժամանակ. 1.    Ղարաբաղում եք, ու  առաջին հարցը, որ այստեղ փողոցում յուրաքանչյուրը Ձեզ կտա` հո՞ղ ենք տալիս Ադրբեջանին: 2.    Հողերի հետ կապված բանակցություններն ընթանո՞ւմ են, թե՞ ոչ: 3.    Շատ հաճախ է խոսվում, որ Ղարաբաղը պետք է լինի բանակցային կողմ: Ի՞նչ եք արել Դուք մինչեւ այսօր, որպեսզի Ղարաբաղը դառնա բանակցային կողմ: 4.    Դուք ի՞նչ եք ակնկալում նախագահների հերթական հանդիպումից: 5.    Նախագահ Բակո Սահակյանի հետ Ձեր այսօրվա հանդիպման նպատակը, եւ ինչո՞ւ դա արվեց վաղը կայանալիք նախագահների հանդիպումից առաջ: 6.    Պարոն նախարար, ասացիք, որ սկզբունքներից մեկը ինքնորոշման իրավունքն է: Ինքնորոշման իրավո՞ւնք, թե՞ ինքնորոշման իրավունքի ճանաչում, չէ՞ որ Ղարաբաղն արդեն ինքնորոշվել է: 7.    Ի՞նչ եք հասկանում` ասելով Ղարաբաղի ժողովուրդ, որտե՞ղ է նա ապրում` ԼՂՀ ներկայի՞ս տարածքում, թե ԼՂԻ՞Մ տարածքում: Ահա այն ամենը, ինչ կար: Ինչպես տեսնում եք, այս հարցերից եւ ոչ մեկը չի համապատասխանում տարածած հաղորդագրության մեջ նշված հարցերին: Ինչո՞ւ է ՀՀ ԱԳՆ մամուլի եւ տեղեկատվության վարչությունը խեղաթյուրում իրականությունը, ու՞մ է դա պետք: