Երեկ Շիրակի մարզից տեղեկություն է ստացվել, որ ժամը 17.00-ի սահմաններում տեղացած հորդառատ անձրեւի հետեւանքով Զույգաղբյուր գյուղի հյուսիսային հատվածում հեղեղաջրերը դուրս են եկել սելավատարից եւ լցվում են բնակիչների տները: Դեպքի վայր է մեկնել Աշոցքի հրշեջ փրկարարական ջոկատը: Պարզվել է, որ ջուրը լցվել է բնակիչների տները, օժանդակ կառույցները եւ անասնագոմերը, խցանվել է գյուղամիջյան կամուրջը, ողողվել են կարտոֆիլի ցանքատարածքները, սատկել են ընտանի թռչուններ: Գյուղապետարանի եւ գյուղի բնակիչների ուժերով իրականացվել են սելավատարի հունի եւ խցանված կամրջի մաքրման, տներից եւ օժանդակ կառույցներից ջրահեռացման աշխատանքներ: Երեկ նաև Լոռու մարզից է տեղեկություն ստացվել, որ ժամը 20.00-ի սահմաններում տեղացած հորդառատ անձրեւի հետեւանքով Վանաձորի Խնձորուտ թաղամասի «Խաչի ձոր» կոչվող հատվածում հեղեղաջրերը դուրս են եկել սելավատարից եւ հոսում Երեւանյան եւ Չուխաջյան փողոցներով` լցվելով բնակելի տների նկուղները: Դեպքի վայր է մեկնել մարզային փրկարարական վարչության օպերատիվ խումբը: Ձեռնարկվել են համապատասխան միջոցներ սելավատարի հունի մաքրման ուղղությամբ: Ջրի հոսքը սելավատարով վերականգնվել է: Ստացված մեկ այլ ահազանգի համաձայն` հորդառատ անձրեւի հետեւանքով վարարել է մարզի Տանձուտ գետի ջուրը, եւ Շահումյան գյուղի մի քանի տներին վտանգ է սպառնում: «Դեպքի վայր է մեկնել մարզային փրկարարական վարչության օպերատիվ խումբը: Ձեռնարկվել են համապատասխան միջոցներ` ափապաշտպան կառույցներն ուժեղացնելու նպատակով»,-տեղեկացնում է Հայաստանի փրկարար ծառայության հասարակայնության և տեղեկատվության հետ կապերի բաժինը: