Ոստիկանության քրեական հետախուզության գլխավոր վարչությունում օպերատիվ տեղեկություններ են ստացվել, որ Հայաստանում են հանցավոր աշխարհում իբրև «օրենքով գող» ճանաչված, 33-ամյա Լաշա Ջելաձեն` «Լաշա Սամտրեցկի» մականունով և 30-ամյա Ռևի Դարախվելիձեն` «Ռևի» մականունով, որոնք տարբեր երկրներից արտաքսվելուց հետո անօրինական ճանապարհով մուտք են գործել ու ապօրինի բնակություն հաստատել Հայաստանում: «Օպերատիվ տեղեկությունների իրացման արդյունքում Լաշա Ջելաձեն և հանցավոր աշխարհում «օրենքով գող» ճանաչված, Գորիս քաղաքի բնակիչ, «Արտեմ» մականունով Արտեմ Դինունցը հայտնաբերվեցին: Վերջինիս մոտից առգրավվեց մոտ 1 գ ափիոն»,- տեղեկացնում է ոստիկանության մամլո ծառայությունը: Պարզվել է, որ Լաշա Ջելաձեն 7 տարի ազատազրկումից հետո Ռուսաստանի Դաշնությունում Շվեյցարիայի Հանրապետության դեսպանատնից ստացել էր Շոթա Ռամինաշվիլիի անվամբ կեղծ տվյալներով վերադարձի վկայական և արտաքսվել Վրաստան: Սակայն հունիսի 25-ին Մոսկվա-Երևան չվերթով նա ժամանել է Հայաստան: Իսկ Ռևի Դարախվելիձեն, որին արտաքսել էին Ռուսաստանի Դաշնությունից, Ուկրանիայից և Թուրքիայից, ապրիլի 23-ին Ստամբուլ-Երևան չվերթով ժամանել և առանց հաշվառման` ընտանիքի հետ, ապօրինի բնակություն էր հաստատել Հայաստանում: Լաշա Ջելաձեն և Ռևի Դարախվելիձեն հանձնվել են Վրաստանի Հանրապետության իրավապահ մարմիններին: