Վրաստանի Սամցխե-Ջավախքի եւ Քվեմո Քարթլի տարածաշրջանների հայկական հասարակական կազմակերպությունների ներկայացուցիչների խորհուրդը քննության առնելով երկրում եւ նրա շուրջ ընթացող ներկա քաղաքական ու հասարակական գործընթացները, այսօր եւս վերահաստատում է նախկինում Վրաստանի պետական կառուցաձեւի վերաբերյալ ընդունած իր տեսակետն ու համոզմունքը, այն է` Վրաստանի պետության բարգավաճման, հզորացման ու զարգացման ապագան` ուղղակիորեն կապված է լինելու դաշնային կառուցաձեւ ունենալու հետ: Դաշնային համակարգով Վրաստանը վերակազմավորելու հիմքում տրվելու են երկրում ազգային համախումբ եւ ավանդաբար ապրող ազգությունների առկայությունը, որոնց ազգային, մշակութային եւ քաղաքացիական իրավունքների պաշտպանվածության հիմնական երաշխիք կարող են դառնալ դաշնության սուբյեկտները` ինքնավարութունները: Այդպիսի կարգավիճակի անհետաձգելի պահանջ է զգացվում նաեւ մեր տարածաշրջանում ապրող հայերիս համար: Վրաստանի դաշնային, ժողովրրդավարական կառուցաձեւ ունենալու անհրաժեշտության մասին իրենց դրական կարծիքներն են հայտնել տարբեր երկրների, այդ թվում նաեւ Վրաստանի բազում առաջադեմ քաղաքական, պետական, հասարակական գործիչներ, կազմակերպությունների, միավորումների, ոչ կառավարական կազմակերպությունների ներկայացուցիչններ: Այդպիսի գաղափար առաջ քաշվեց նաեւ հուլիսի 23-ին Վրաստանի պարլամենտում ելույթ ունեցող, ԱՄՆ-ի փոխնախագահ Ջո Բայդենի կողմից. «Վերահամարկման պատերազմական տարբերակ գոյություն չունի, միայն խաղաղ եւ բարգավաճ Վրաստանը կարող է տարածքային ամբողջականությունը վերականգնելու ապագա ունենալ, Աբխազիային եւ Հարավային Օսեթիային ցույց տալ այնպիսի Վրաստան, որտեղ նրանք կարող են լինել ազատ եւ որտեղ իրենց բնակչությունը կարող է բարգավաճել, որտեղ նրանք կարող են օգտվել դաշնային համակարգի շրջանակներում գործող ինքնավարությունից…»: Մենք ողջունում ենք պարոն Բայդենի դաշնային Վրաստան ստեղծելու առաջարկը, որը, համոզված ենք, ԱՄՆ-ի ադմինիստրացիայի կարծիքի արտահայտությունն է: Սակայն նրա ելույթում արհեստականորեն մոռացության մատնվեցին Վրաստանում ապրող այն ազգային փոքրամասնությունները, որոնք ոչ պակաս իրավունքներ ունեն դաշնության անդամ ինքնավարություններ ձեւավորելու խնդրում: Պարոն Ջո Բայդենի եւ ԱՄՆ-ի ադմինիստրացիայի վերոնշյալ գնահատականը մեկ անգամ եւս հաստատում է դեռեւս քսաներրորդ դարի վերջերից սկսած մեր կողմից Վրաստանի դաշնային կառուցաձեւ ունենալու անհրաժեշտության վերաբերյալ առաջարկությունների նպատակահարմարությունը: Մեր ընտրած քաղաքական պայքարի ճանապարհով մենք ակտիվ մասնակցություն ենք բերելու Վրաստանին դաշնային կառուցաձեւով օժտելու եւ Ջավախքը այդ դաշնության լիիրավ միավոր դարձնելուն ուղղված գործընթացներին: Մեր ընտրած ուղին արդար է եւ ուղղված է Վրաստանը ժողովրդավարական, բարգավաճ, հզոր երկիր ձեւավորելուն: Համոզված ենք, որ ազգամիջյան փոխհանդուրժողականությունը պարտադիր պահանջ է լինելու Վրաստանի բոլոր ազգությունների քաղաքացիներիս համար: Սամցխե-Ջավախքի եւ Քվեմո Քարթլիի հայկական հասարակական կազմակերպությունների խորհուրդ Ք.Ախալքալաք 29. 07. 2009 թ.