Նախորդ համարներում անդրադարձել էինք Գեղարքունիքի մարզի ընդհանուր իրավասության դատարանի (Մարտունի քաղաքի նստավայր) վարույթում գտնվող քաղաքացիական գործին: Հիշեցնենք, որ Պավել  Բաղմանյանին  պատկանող «Պավել եւ ընկերներ» ՍՊԸ-ն հայցով դիմել է դատարան ընդդեմ «Մարտունու պանրագործարան» ԲԲԸ-ի՝ պահանջելով ճանաչել սեփականության իր իրավունքը եւ հարկադիր կարգով կնքել վարձակալության պայմանագիր:

«Մարտունու պանրագործարան» ԲԲԸ-ն էլ հակընդդեմ հայցով պահանջում է օրինական ճանաչել ընկերության սեփականությունը հանդիսացող հողամասում կառուցված ինքնակամ շինությունը եւ դրանց նկատմամբ ճանաչել «Մարտունու պանրագործարան» ԲԲԸ-ի սեփականության իրավունքը (տես հոդվածը` Գեներալն ազդում է նաեւ դատարանի վրա):

«Պավել եւ ընկերներ» ՍՊԸ-ի ներկայացուցիչը հուլիսի 10-ի դատաքննության ընթացքում դատատեխնիկական փորձաքննություն նշանակելու մասին միջնորդություն ներկայացրեց եւ փորձագետների լուծմանն առաջադրեց հետեւյալ հարցերը.

1. Որքա՞ն է կազմում ՀՀ Գեղարքունիքի մարզի Մարտունի քաղաքի Աբովյան 1 հասցեում գտնվող հողատարածքը, ըստ նպատակային նշանակության՝ ի՞նչ դասի է, ե՞րբ, ու՞մ եւ ի՞նչ կարգով է հատկացվել, այժմ ու՞մ սեփականությունն է հանդիսանում, եւ ի՞նչ իրավունքներ կան գրանցված այդ հողամասի նկատմամբ:

2. Չափագրման աշխատանքներ կատարելու միջոցով պարզել, թե վերը նշված հասցեում «Պավել եւ ընկերներ» ՍՊԸ-ի կողմից փաստացի որքա՞ն շինություն եւ հողատարածք է զբաղեցվում, նշված շենք-շինությունները գտնվում են հատկացվա՞ծ, թե՞ զավթված հողատարածքի վրա: 3. Նշված տարածքում կառուցված գազալիցքավորման ճնշակայանը հանդիսանու՞մ է անշարժ գույք, թե՞ ոչ: 10.07.2009 թ. որոշումով դատարանը միջնորդությունն ամբողջությամբ բավարարել է:

Նշենք, որ «Մարտունու պանրագործարան» ԲԲԸ-ն դատարան է ներկայացրել Աբովյան 1 հասցեում գտնվող 6 հա հողամասի նկատմամբ իր իրավունքների գրանցումը հավաստող Կադաստրի Մարտունու տարածքային ստորաբաժանման կողմից տրված վկայականը, որից 0.60 հա անօրինական կարգով զբաղեցրել է «Պավել եւ ընկերներ» ՍՊԸ-ն: Մնացած 5.4 հա հողամասի վերաբերյալ դատարանում որեւէ վեճ չկա: «Մարտունու պանրագործարան» ԲԲԸ-ի տնօրեն Թաթուլ Բաղդասարյանը «Հետքին» փոխանցեց, որ իր տեղեկություններով՝ Կադաստրի աշխատակիցներն արդեն չափագրումներ են արել եւ այդ մասին իրեն տեղյակ չեն պահել:

Հեռախոսով զրուցեցինք Կադաստրի Մարտունու ստորաբաժանման պետ Վրույր Վարդանյանի հետ: Նա ասաց, որ չափագրումներ անելու հրաման տվել է, սակայն տեղյակ չէ՝ չափագրումներ արե՞լ են, թե՞ ոչ: Հետաքրքիր է՝ ինչպե՞ս են Կադաստրի աշխատակիցները օբյեկտիվ չափագրումներ անելու, երբ այս գործով նրանք շահագրգիռ կողմ են եւ դատարանում ներկայանում են որպես երրորդ անձ: Նշենք, որ Կադաստրը փորձաքննություն իրականացնելու իրավունք չունի, քանի որ չունի հատուկ լիցենզիա, իսկ դատարանը, գերազանցելով իր իրավասությունները, Կադաստրին շնորհել է փորձաքննություն իրականացնելու իրավունք: ՀՀ Քաղաքացիական դատավարության օրենսգրքի 3-րդ հոդվածի համաձայն` դատարանը քաղաքացիական գործը հարուցում է միայն հայցի կամ դիմումի հիման վրա: Այս դեպքում որեւէ մեկը չի դիմել դատարան 6 հա հողամասի նկատմամբ պանրագործարանի գրանցված իրավունքների վիճարկման հայցով, հետեւաբար դատարանն իրավունք չուներ դատատեխնիկական փորձաքննություն նշանակելու միջոցով չափագրել ամբողջ 6 հա-ը:

Դրանով դատարանը դուրս է եկել ներկայացված հայցի առարկայի շրջանակներից եւ իր նախաձեռնությամբ փորձում է վեճի առարկա դարձնել գույքի նկատմամբ ընկերության իրավունքը, որը սահմանված կարգով գրանցված է: Բացի այդ, «Պավել եւ ընկերներ» ՍՊԸ-ն ընդունել է պանրագործարանի սեփականության իրավունքը 0.60 հա հողամասի նկատմամբ եւս եւ ցանկանում է պարտադրել «Մարտունու պանրագործարան»-ին կնքելու վարձակալության պայմանագիր:

Պավել Բաղմանյանին պատկանող ՍՊԸ-ն դատարան է ներկայացրել Կադաստրի Մարտունու ստորաբաժանման կողմից 27.05.2009 թ. տրված մի գրություն, որտեղ տեղ են գտել բազմաթիվ կեղծ տեղեկություններ:

Մասնավորապես, նշված է, որ պանրագործարանին պատկանում է 2.3 հեկտար, եւ այն ստացել է պետական գրանցում, իսկ մնացած 3.7 հեկտարից 0.64 հա հողատարածքը զբաղեցնում է «Պավել եւ ընկերներ» ՍՊԸ-ի գազալցակայանը, իսկ 3.06 հա հողատարածքը տարիներ շարունակ զբաղեցրել են սահմանակից սեփականատերերը

: «Նշված տարածքներն ընդհանուր` 6 հա, գտնվում են բնակավայրի ներսում, որից 2.3 հա-ը պանրագործարանի սեփականությունն է, իսկ 0.64 հա-ը ներկա պահին հանդիսանում է համայնքային սեփականություն»,- նշված է Կադաստրի կողմից ՍՊԸ-ի ներկայացուցչին տրված գրության մեջ:

Նշված գրությունը  հակասում է նույն կառույցի կողմից 30.10.2003 թ. տրված սեփականության իրավունքի վկայականին: «Երջանիկ պատահականությամբ» համայնքային սեփականություն է համարվում այնքան հողամաս, որքանի վրա կառուցված է գեներալի որդու գազալցակայանը` 0.64 հա:

Ստացվում է, որ Գեղարքունիքի մարզի ընդհանուր իրավասության դատարանը, Մարտունու քաղաքապետարանն ու Կադաստրի Մարտունու ստորաբաժանումն ամեն գնով փորձում են սեփականատիրոջ ձեռքից խլել նրա սեփականությունը եւ «նվիրել» գեներալ Հայկազ Բաղմանյանի որդուն: