Այս տարի Ղարաբաղում կմեկնարկի ավագ դպրոցների ծրագիրը, որի շրջանակներում սեպտեմբերից 2 ավագ դպրոց կգործի Ստեփանակերտում /թիվ 8 եւ թիվ 11 դպրոցներում/, իսկ 1-ը` Շուշիում /Մուրացանի անվան դպրոցում/: Հոսքային ուսուցմամբ դպրոցներ կգործեն Հադրութ, Մարտակերտ, Ասկերան, Մարտունի շրջկենտրոններում եւ Մարտունու շրջանի Ճարտար գյուղում: Այս մասին «Հետքին» տեղեկացրեց ԼՂՀ կրթության եւ գիտության նախարար Վլադիկ Խաչատրյանը: Նախարարի խոսքերով, օգոստոսի 15-ից կսկսվի ավագ դպրոցների ուսուցիչների վերապատրաստման գործընթացը, որը կտեւի 10 օր: Վերապատրաստումը կանցկացվի Երեւանի պետական համալսարանի եւ Հայաստանի ազգային ինստիտուտի մասնագետների կողմից: Վլադիկ Խաչատրյանի հավաստմամբ` ընդհանուր առմամբ պատրաստ են նոր ուսումնականին` առարկայական ծրագրերը պատրաստ են, դասագրքերը` պատվիրված, հանրապետության բոլոր դպրոցներում արդեն չկա նստարանների խնդիր, այժմ քայլեր են ձեռնարկվում դպրոցական այլ գույքի ձեռքբերման ուղղությամբ: «Փյունիկ» հիմնադրամի կողմից ստացել ենք քիմիայի, ֆիզիկայի, կենսաբանության եւ աշխարհագրության 45-ական լաբորատորիա»,-մեզ հետ զրույցի ժամանակ ավելացրեց ԿԳ նախարարը: Այս ուսումնական տարում առաջին զանգը հնչելու է  հանրապետության 231 դպրոցում: Սեպտեմբերին միայն պատրաստ կլինի Ասկերանի դպրոցի նոր մասնաշենքը: Ընթացքի մեջ են Ստեփանակերտի թիվ 1, 6, 11 եւ Մարտունու շրջանի Սպիտակաշեն, Գիշի գյուղերի դպրոցների նոր մասնաշենքերի շինարարական աշխատանքները: