Արցախյան պատերազմում զոհված և վիրավոր ազատամարտիկների ընտանիքների բնակարանային պայմանների բարելավման համար ՀՀ պաշտպանության նախարարի  կողմից ստեղծված հաձնաժողովի հետ համատեղ Արագածոտնի մարզում հստակեցվել են  մինչ այժմ հաշվառման վերցված զոհված և վիրավոր ազատամարտիկների ընտանիքների  հիմնական և լրացուցիչ ցուցակները: Այս տարի մարզպետարան է դիմել  բնակարանի  և  բնակարանի  բարելավման կարիք ունեցող  զոհված  և  վիրավոր  զինծառայողների    եւս 10 ընտանիք:  Ըստ այդմ,  հունիս ամիսվա դրությամբ  պաշտպանության նախարարություն է  ուղարկվել 93 գործ: Մարզի բոլոր զոհված  ազատամարտիկների  ընտանիքներն  ընդգրկված են  աղքատության ընտանեկան նպաստ  ստացողների  ցուցակներում: Իսկ Հայաստանի մանկատների հիմնադրամի «Մեկ ընտանիք - մեկ հայրենիք» ծրագրի շրջանակներում այդ ընտանիքների երեխաները պարբերաբար ստանում են  դրամական օգնություն: Ինչ վերաբերում է սոցիալապես անապահով ընտանիքներին, ապա մարզից  սոցիալապես անապահով շուրջ 4800 ընտանիք ընդգրկված է «Փարոս» համակարգում  և ստանում է ընտանեկան  նպաստ: Եւս 825 ընտանիք ներգրավված է հրատապ օգնության ցուցակներում: Մարզպետարանի աջակցության սոցիալական հանձնաժողովի  կողմից տրամադրված տեղեկատվության համաձայն, Սոցիալական աջակցության «Պառնաս» ծառայության անհատական հաշվառման և տնային այցելությունների համադրման արդյունքում 2008թ. համեմատությամբ նպաստառու ընտանիքների թիվը նվազել է 800-ով: Ինչպես ամեն տարի, այս տարի եւս հուլիս-օգոստոս ամիսներին կազմակերպվել է զոհված և վիրավոր, ինչպես նաև   սոցիալապես անապահով ընտանիքների հանգիստը: 200 երեխա հանգստացել է  Ծաղկաձորի «Տանձաղբյուր» ճամբարում: «Քրիստոնեական մշակութային միջազգային ծառայություններ» բարեգործական հասարակական կազմակերպության հետ` «Կոշիկի տուփ» ծրագրով,  շուրջ 300 երեխաներ ստացել են նվերներ: Խոցելի խավին աշխատանքով ապահովելու նպատակ ունի «Վարձատրվող հասարակական աշխատանքներ» ծրագիրը: Այս տարի այդ շրջանակում իրականացվում է 16 համայնքային ծրագիր, որի գումարը 28,8 մլն.դրամ է: Առաջին կիսամյակի արդյունքներով 14 համայնքային ծրագիր արդեն  ավարտվել է:  Երկրորդ հերթով ծրագրեր են իրականացվելու Հարթավան եւ  Շողակն համայնքներում, որոնք այս ամսից են սկսվելու: Ծրագրերը նպատակաուղղված են հիմնականում ներհամայնքային ճանապարհների, փողոցների բարեկարգման, խմելաջրի և ոռոգման համակարգի նորոգման աշխատանքներին: Դրանք հնարավորություն են տվել  աշխատանքով ապահովելու  292 քաղաքացու: Այս ամենով հանդերձ, մարզում աղքատների թիվը չի նվազում եւ հաճախ կարելի է տեսնել աղբի մեջ սնունդ փնտրողների: Վառ օրինակ Սասունիկ համայնքի 20 ընտանիքները, որոնք աղբավայրի հաշվին են գոյատեւում: