ՀՀ գլխավոր դատախազության պետական շահերի պաշտպանության վարչությունում ՀՀ վերահսկիչ պալատի՝ 2009թ. մարտի 27-ին Արմավիրի  մարզի Տալվորիկ համայնքում ստուգման արդյունքներով կազմած արձանագրության հիման վրա նախապատրաստված  նյութերի քննարկման արդյունքում հարուցվել է քրեական գործ: Ստուգման արդյունքում պարզվել է, որ 2005թ. հունիսի 20-ին Արմավիրի  մարզի Տալվորիկի գյուղապետարանի և «Տագգատէ» ՍՊ ընկերության միջև կնքված գյուղապետարանի վարչական շենքի կառուցման կապալի պայմանագրի հիման վրա կատարվող շինարարական աշխատանքների ընթացքում ընկերության տնօրեն Ավագ Մելքոնյանը կատարողական ակտերում փաստացի կատարված աշխատանքների վերաբերյալ կեղծ տվյալներ ներառելու միջոցով հավելագրել է 3.745,0 հազար դրամի չկատարված աշխատանքներ և խաբեությամբ  գյուղապետարանից ստացել և հափշտակել է առանձնապես խոշոր չափերի գումար: 2007թ. նոյեմբերի 11-ին և 2008թ. մարտի 14-ին  Տալվորիկի համայնքի գյուղապետարանի և «Վրույր և Ագապի» ՍՊ ընկերության միջև կնքված Տալվորիկ համայնքի ջրամատակարարման ցանցի հիմնանորգման և գրունտային ճանապարհի կառուցման պայմանագրերի հիման վրա կատարվող շինարարական աշխատանքների ընթացքում ընկերության տնօրեն Դավիթ Դավթյանը կատարողական ակտերում փաստացի կատարված աշխատանքների վերաբերյալ կեղծ տվյալներ ներառելու միջոցով հավելագրել է 2.194,2 հազար դրամի չկատարված աշխատանքներ և խաբեությամբ  գյուղապետարանից ստացել և հափշտակել է խոշոր չափերի գումար, իսկ Արմավիր մարզի Տալվորիկի գյուղապետ Կիրակոս Սաղաթելյանը, հանդիսանալով պաշտոնատար անձ, իր պաշտոնեական դիրքը ծառայության շահերին հակառակ օգտագործելով, անձնական այլ շահագրգռվածությունից ելնելով, այն է` 2007 և 2008 թվականներին «Տագգատէ» և «Վրույր և Ագապի» ՍՊ ընկերությունների հետ կնքված պայմանագրերով Տալվորիկի գյուղապետարանի վարչական շենքի շինարարության, համայնքի ջրամատակարարման ցանցի նորոգման և գրունտային ճանապարհի կառուցման համար չկատարված աշխատանքների դիմաց վերջիններիս  ավել է վճարել ընդհանուր առմամբ 5.939,2 հազար դրամ: Բացի այդ` համայնքի բնակիչներից հավաքած 1.237,0 հազար դրամի վարձավճարները համայնքի բյուջե չի մուտքագրել և կատարել է ոչ նպատակային ծախսեր, որով էական` 7.176,2 հազար դրամի վնաս է պատճառել համայնքի շահերին: Փաստի առթիվ ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ` ՀՀ քրեական օրենսգրքի 178-րդ հոդվածի 3-րդ մասի 1-ին կետի, 178-րդ հոդվածի 2-րդ մասի 2-րդ կետի և 308-րդ հոդվածի 1-ին մասի հատկանիշներով: Այս մասին հայտնում է Դատախազության կայքէջը: