Տեսանյութեր
Լուսանկարներ
Մամուլի տեսություն
Վճռաբեկը կունենա նոր նախագահ
Ժամանակին Վճռաբեկ դատարանի դատավոր Անատոլի Մաթևոսյանը աշխատանք էր տանում, որ նշանակվի Վերաքննիչ քաղաքացիական դատարանի նախագահ Էդվարդ Մուրադյանի տեղը: Օրեր անց այդպես էլ եղավ` Մուրադյանին «սեփական դիմումի համաձայն» ազատեցին աշխատանքից, նրա փոխարեն նշանակվեց Անատոլի Մաթևոսյանը:
Հիմա նա սկսել է աշխատել Վճռաբեկ դատարանի նախագահ նշանակվելու ուղղությամբ: Նախագահականում ունեցած իր կապերի միջոցով նա փորձում է հասնել Վճռաբեկի նախագահ Արման Մկրտումյանի պաշտոնաթողությանը և նրա տեղում իր նշանակմանը:
«Հրապարակի» աղբյուրները նշում են, որ Ա. Մկրտումյանի պաշատոնանկության հարցը, հատկապես հոր հետ ունեցած սկանդալային պատմությունից հետո, որը որդու դեմ ունեցած դժգոհություններն արտահայտել էր մամուլին հղած նամակում, արդեն իսկ որոշված է, և դա տեղի է ունենալու աշնանը:
Սակայն Վճռաբեկի նախագահի աթոռի համար պայքարը թեժ է լինելու. հավակնորդների պակաս չի զգացվում:
Միստիկ տպավորություն
Օրեր առաջ Սևանի մայրուղու Սևան քաղաքի մերձակայքում ավտովթարից մահացել էր 14-ամյա մի երեխա: Սևանցիները պատմում են, որ մի քանի տարի առաջ այդ երեխայի մորը գրեթե նույն վայրում վրաերթի էր ենթարկել «Որոգայթ» ֆիլմի Գոքորը` Գեղամ Ղանդիլյանը: Հետո նա տարիներ շարունակ օգնել է մահացածի ընտանիքին:
Երիտասարդ դերասանն ինքը վերջերս ավտովթարի զոհ դարձավ, նրա մահը սևանցի ընտանիքը շատ ծանր է տարել: Նրանք կորցրել են ավելին, քան ընտանիքի բարեկամն է:
«Գոքորի» մահին հաջորդած ավտովթարն ու երեխայի մահն ընդհանրապես միստիկ տպավորություն են թողել Սևանում:
Իզուր հաց ուտող չե՞ն
Հակառակ արտգործնախարար Էդվարդ Նալբանդյանի հայտարարության, թե հայկական կողմը համաձայնություն չի տվել Մադրիդյան սկզբունքներին, ուղղակի համաձայնել է, որ դրանք բանակցությունների համար հիմք լինեն, ԵԱՀԿ ՄԽ համանախագահ Մեթյու Բրայզան պնդել է, որ ԼՂ կարգավորման բոլոր հիմնարար սկզբունքները ֆունդամենտալ կերպով համաձայնեցված են, սակայն մանրամասները դեռ քննարկման կարիք ունեն:
Մեկնաբանելով այս հայտարարությունները` ՀՀՇ վարչության անդամ Հովհաննես Իգիթյանն ասել է. «Համոզված եմ, որ Բրայզան այս դեպքում ավելի անկեղծ է, որովհետև շատ լավ հասկանում է գործընթացը, իսկ Նալբանդյանը, ՀՀԿ-ի հետ մասին, ստիպված է ցույց տալ, որ սա հերթական դիվանագիտական հաղթանակ է, և իրենք իրենց «հացը» իզուր չեն ուտում»:
Ո՞վ համաներում կհայտարարի, եթե մեղավոր լինեն բոլորը
Հետևելով ՀԱԿ-ի մարզային այցերին` ոչ մի կերպ չես կարողանում ձերբազավել տպավորությունից, թե ապրում ես Վիլյամի ժամանակներում. դեկորացիա հիմնականում չկա, ավելի ճիշտ այն մշտապես նույնն է, իսկ որպեսզի հանդիսատեսն ինչ-որ կերպ կողմնորոշվի, բեմ են բերում գործողության վայրը նշող ցուցանակներ` Հրազդան, Գյումրի...
Տեր-Պետրոսյանի խաղացած ներկայացման գործնական օգուտի վերաբերյալ լուրջ կասկածներ կան. եթե նա մտադիր է այդ կերպ հաշվարկով ամուսնություն կնքել մարզերի բնակչության հետ, ապա կկրի ժամանակակից հեքիաթի տղայի ճակատագիրը: Վերջինս ամուսնացավ հարուստ պառավի հետ` նրա ժառանգությունը ստանալու համար: Երբ տղան մահացավ, նրա բոլոր խաղալիքները մնացին պառավին:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել