Հարկային պարտավորությունը չկատարած քաղաքացուն տեղեկանք չեն տրամադրում

Տեւական ժամանակ է, ինչ վարդենիսցիները քաղաքապետարանի հետ գործ ունենալու դեպքում պետք է իրենց դրամապանակում գումար ունենան, քանի որ քաղաքապետարանի հետ ցանկացած գործարքի դեպքում քաղաքապետարանի աշխատակիցները նախ համոզվում են` քաղաքացին չմուծված հարկեր ունի՞, թե ՞ ոչ: Եթե պարտքեր ունի, ապա մինչեւ դրանք չվճարի, նրա հետ գործարք չեն կատարում, ինչը լուրջ դժգոհությունների առիթ է տալիս:

Վերջերս Վարդենիսի քաղաքապետի ընդունարանի հարեւանությամբ հայտնվել է մի հայտարարություն, որը քաղաքացիներին հորդորում է նախ մտնել հարկային բաժին, վճարել ունեցած պարտքերը, ապա մոտենալ քարտուղարություն` անհրաժեշտ տեղեկանքը վերցնելու համար: «Եթե քաղաքացու նկատմամբ մեր ստանձնած պարտավորությունը կատարում ենք, քաղաքացին էլ պարտավոր է իր պարտավորությունները կատարի: Այսօր քաղաքացին հողի կամ գույքահարկի պարտքեր ունի, չէ ՞ որ այդ հարկերի վճարումով է քաղաքապետարանը գոյատեւում: Իրենք իրենց պարտավորությունը չեն կատարում ու ասում են` ցանկացած տեղեկանքը պիտի տաս: Բա մենք ո ՞ նց աշխատենք: Ես էլ գրել եմ` եթե քաղաքացին պարտք է, պետք է իր պարտավորությունները կատարի: Դուք ասեք, ինձ ուղություն ցույց տվեք, ես էլ աշխատեմ»,- քաղաքապետարանի նորամուծությունը «Հետքին» պարզաբանեց Վարդենիսի քաղաքապետ Վոլոդյա Խլոյանը: Քաղաքապետարանում մեր գտնվելու պահին տեղեկանք վերցնելու համար այնտեղ էր եկել վարդենիսցի Ռիմա Խաչատրյանը: Նրա համար անակնկալ էր ընդունարանի հարեւանությամբ փակցված հայտարարությունը: Մի քանի անգամ կարդալուց ու համոզվելուց հետո, որ անպայման պետք է հարկերը վճարի, նոր տեղեկանք վերցնի, առանց քարտուղարություն մտնելու տարեց կինը ձեռնունայն հեռացավ քաղաքապետարանից: «Բալա ջան, ես ի՞նչ գիտենայի, որ ստեղ էլ են փարա ուզում տեղեկանք տալու համար: Հողերը մեր գլխին, սաղ եղան փող աշխատող, մինակ մենք մացինք չոր ու ցամաք»,- դժգոհեց տիկին Ռիման: Քաղաքապետի ասելով` ինքն առաջարկել է քաղաքացիներին` եթե ունեցած պարտքերը միանգամից չեն կարողանում վճարել, համամասնորեն վճարեն կամ էլ պարտավորագիր գրեն, որ քաղաքապետարան հաջորդ գալուց` պարտքը մարեն: «Դուք ինձ հասկացեք, մենք էլ պլան ենք կատարելու, աշխատավարձ պետք է տանք, եթե ոչ, ուրեմն անհնարին է աշխատել: Քաղաքացուն այսօր պետք է բերել իրավական դաշտ, որպեսզի քեզ հաշվետու լինեն: Եթե որեւէ մեկը տեղեկանքի համար ավելորդ փող ուզի, կբռնեմ ականջները կկտրեմ: Մենք պարզապես ասում ենք` քո պարտավորությունը կատարիր: Շատ դեպքերում քաղաքացիներին չենք կարողանում տանը բռնացնել, վերջապես գալիս են քաղաքապետարան, մեզ հետ գործ են ունենում, խնդրում ենք, որ հարկերը վճարեն, իրենց վրա չենք բռնանում»,-ավելացրեց քաղաքապետը: Վ. Խլոյանի փոխանցմամբ` բազմաթիվ դատական գործեր ունեն, որոնք վերաբերում են քաղաքացիների կողմից հարկային պարտավորությունների չկատարմանը: «Խո չե՞մ հաշվել, թե ինչքան դատական գործ ունենք, բայց դատարան դիմելն էլ հեշտ բան չի: Եկեք մի կողմն էլ նայենք, մեր ժողովուրդն են, սոցիալական վատ պայմաններում են ապրում, եթե հնարավորություն ունենան, կվճարեն, էլի, ոչ մեկին էլ հաճելի չի, որ իրան անընդհատ ասեն` դու պարտք ես, պիտի վճարես: Քաղաքացիներն էլ մեղք չունեն»,- ասաց քաղաքապետը: